پاکستان کا بڑھتا ہوا عالمی کردار، بھارت کا “وشو گرو” بیانیہ کمزور پڑنے لگا

پاکستان نے حالیہ عالمی سفارت کاری میں نمایاں پیش رفت حاصل کرتے ہوئے مشرقِ وسطیٰ اور ایران سے متعلق امن مذاکرات میں اپنا کردار مضبوط کیا ہے، جس کے بعد خطے میں اس کی اہمیت میں اضافہ دیکھا جا رہا ہے۔ اس صورتحال کے نتیجے میں بھارت کے “وشو گرو” اور “وشو بندھو” جیسے بیانیے کو بھی چیلنج کا سامنا ہے۔

رپورٹ کے مطابق عالمی سطح پر پاکستان کی بڑھتی ہوئی سفارتی سرگرمیوں نے اسے مختلف ممالک کے درمیان رابطہ کار کے طور پر ابھارا ہے، جبکہ بھارت کی خارجہ پالیسی اور کردار پر سوالات اٹھنے لگے ہیں۔ بعض مبصرین کے مطابق نئی دہلی کی کوششیں، جن میں پاکستان کو عالمی سطح پر تنہا کرنے کی پالیسی بھی شامل تھی، خاطر خواہ کامیاب نہیں ہو سکیں۔

ادھر پاکستان کے چین، ایران اور خلیجی ممالک کے ساتھ تعلقات مزید مستحکم ہوئے ہیں جبکہ امریکہ کے ساتھ بھی روابط میں بہتری دیکھی جا رہی ہے۔ اس کے برعکس بھارت کی بعض سفارتی پوزیشنز میں تناؤ اور تضادات نمایاں ہو رہے ہیں، جس سے اس کے عالمی بیانیے کو چیلنج درپیش ہے۔