کسی بھی جماعت کی تنظیمی مضبوطی اور فعالیت میں شعبہ مالیات بنیادی اہمیت رکھتا ہے، حاجی صالح محمد

کوئٹہ ( )
جمعیت علماء اسلام ضلع کوئٹہ کے تحصیلوں اور یونٹوں کے ناظمین مالیات کا اہم اجلاس ضلعی سیکرٹری مالیات حاجی صالح محمد کی زیرِ صدارت ضلعی دفتر میں منعقد ہوا۔ اجلاس میں شعبہ مالیات کی تنظیمی فعالیت مالیاتی امور کی بہتری آمدن و اخراجات کے شفاف حساب و کتاب اور جماعتی مالی ذمہ داریوں کی بہتر ادائیگی سمیت مختلف اہم امور پر تفصیلی غور و خوض کیا گیا۔ اجلاس سے خطاب کرتے ہوئے حاجی صالح محمد، معاونین سیٹھ اجمل بازئی، میر سرفراز شاہوانی اور دیگر نے کہا کہ کسی بھی جماعت کی تنظیمی مضبوطی اور فعالیت میں شعبہ مالیات بنیادی اہمیت رکھتا ہے۔ تحصیلوں اور یونٹوں کے ناظمین مالیات اپنی ذمہ داریاں احساسِ ذمہ داری اور دیانت داری کے ساتھ ادا کریں۔ مالیاتی نظام کو منظم اور شفاف بنانے کے لیے آمدن و اخراجات کا مکمل ریکارڈ مرتب کیا جائے اور ماہانہ بنیادوں پر مالیاتی رپورٹ مجلس عاملہ کو پیش کی جائے۔ انہوں نے ہدایت کی کہ ہر تحصیل اور یونٹ میں مالیاتی رجسٹر مرتب کیا جائے جس میں اراکین مجلسِ عاملہ مجلسِ عمومی اور مجلسِ شوریٰ سے وصول ہونے والے چندہ جات دیگر مالی عطیات آمدن اور اخراجات کا باقاعدہ اندراج یقینی بنایا جائے۔ اسی طرح ضلعی جماعت کے لیے مقررہ دستوری چندے کی بروقت ادائیگی اور ہر مالی لین دین کی باقاعدہ رسید کا اہتمام کیا جائے۔ اجلاس میں اس عزم کا اظہار کیا گیا کہ شعبہ مالیات کو مزید فعال منظم اور مستحکم بنانے کے لیے تحصیلوں اور یونٹوں کی سطح پر اہم اقدامات کیے جائیں گے اور مالیاتی امور میں نظم و ضبط شفافیت اور جواب دہی کو یقینی بنایا جائے گا۔