ایران اور امریکا کے درمیان مذاکرات میں پاکستان نے اہم اور مثبت کردار ادا کیا، جے ڈی وینس

واشنگٹن: امریکا کے نائب صدر جے ڈی وینس نے ایران اور امریکا کے درمیان ہونے والے مذاکرات میں پاکستان کے کردار کو سراہتے ہوئے اسے اہم اور مثبت قرار دیا ہے۔

اپنے بیان میں جے ڈی وینس نے کہا کہ وہ فیلڈ مارشل عاصم منیر اور وزیر اعظم شہباز شریف کو خصوصی کریڈٹ دینا چاہتے ہیں، جنہوں نے میزبان کے طور پر غیر معمولی قائدانہ صلاحیتوں کا مظاہرہ کیا۔

انہوں نے کہا کہ دونوں رہنماؤں نے اعلیٰ درجے کی ریاستی بصیرت کا مظاہرہ کرتے ہوئے امریکا اور ایران کے درمیان بات چیت کو ممکن بنایا، جو طویل عرصے سے ایک دوسرے کے ساتھ سنجیدہ مذاکرات نہیں کر رہے تھے۔

نائب صدر کے مطابق پاکستان کی مؤثر میزبانی اور سفارتی کوششوں نے دونوں ممالک کو مذاکرات کی میز پر لانے میں کلیدی کردار ادا کیا، جس سے خطے میں کشیدگی کم ہونے کی امید پیدا ہوئی ہے۔

تجزیہ کاروں کا کہنا ہے کہ عالمی سطح پر پاکستان کے اس کردار کو ایک بڑی سفارتی کامیابی کے طور پر دیکھا جا رہا ہے، جس سے نہ صرف پاکستان کی اہمیت میں اضافہ ہوا ہے بلکہ خطے میں امن کے امکانات بھی روشن ہوئے ہیں۔