راولپنڈی، اٹک اور میانوالی سے اضافی پولیس نفری کی مرحلہ وار واپسی کا فیصلہ

راولپنڈی: خیبر پختونخوا میں ایمرجنسی کے نفاذ اور حالات معمول پر آنے کے بعد راولپنڈی، اٹک اور میانوالی سے اضافی پولیس نفری کی مرحلہ وار واپسی کا فیصلہ کرلیا گیا ہے۔ تاہم راولپنڈی اور اسلام آباد میں تعینات اینٹی رائٹ مینجمنٹ فورس تاحکمِ ثانی اپنی موجودہ جگہوں پر موجود رہے گی۔

ذرائع کے مطابق پاکستان تحریک انصاف کے لانگ مارچ اور دھرنے کے سلسلے میں تعینات اضافی پولیس اہلکاروں کی واپسی تین مرحلوں میں مکمل کی جائے گی۔ پہلے مرحلے میں اہلکاروں کی واپسی کا عمل پیر کی شام سے شروع کردیا گیا، جبکہ مختلف مقامات پر لگائے گئے کنٹینرز اور عارضی رکاوٹیں ہٹانے کا سلسلہ بھی جاری ہے۔

ذرائع کا کہنا ہے کہ اٹک میں 29 ہزار سے زائد، اسلام آباد میں تقریباً 22 ہزار اور راولپنڈی میں ضلعی پولیس کی معاونت کے لیے 5 ہزار سے زائد اضافی اہلکار تعینات کیے گئے تھے۔

پولیس نفری کی واپسی کا شیڈول متعلقہ افسران کی مشاورت سے مرتب کیا گیا ہے۔ متعلقہ آر پی اوز، سی پی اوز اور ڈی پی اوز نے اہلکاروں کی واپسی کے طریقہ کار کی منظوری دے دی ہے۔

حکام نے ہدایت کی ہے کہ پولیس اہلکاروں کی واپسی سے قبل نفری، گاڑیوں اور دیگر سامان کا ریکارڈ مکمل کیا جائے۔ اس کے ساتھ ساتھ اضافی نفری کی واپسی کے باوجود سیکیورٹی انتظامات اور ہنگامی صورت حال سے نمٹنے کی تیاری برقرار رکھی جائے۔

دوسری جانب فسادات سے نمٹنے کے لیے تعینات خصوصی اینٹی رائٹ مینجمنٹ فورس کو فی الحال راولپنڈی اور اسلام آباد میں اپنی موجودہ جگہوں پر برقرار رکھنے کا فیصلہ کیا گیا ہے تاکہ کسی بھی ہنگامی صورت حال میں فوری کارروائی کی جاسکے۔

حکام نے پولیس نفری کی واپسی کے عمل کو محفوظ، منظم اور مربوط بنانے کی ہدایت کرتے ہوئے مسلسل ڈیوٹی انجام دینے والے پولیس افسران اور اہلکاروں کی خدمات کو سراہا ہے۔