رائس ملز ایسوسی ایشن اوستہ محمد کی سابقہ کابینہ تحلیل، نئے انتخابات کے لیے 8 رکنی کمیٹی قائم

اوستہ محمد (نمائندہ خصوصی)
رائس ملز ایسوسی ایشن اوستہ محمد کا اہم اجلاس زیرِ صدارت عنایت اللہ عرف مور خان جتک منعقد ہوا، جس میں رائس ملز ایسوسی ایشن کے ممبران نے بڑی تعداد میں شرکت کی۔ اجلاس کے دوران ایسوسی ایشن کی سابقہ کابینہ کی تین سالہ مدت مکمل ہونے، کابینہ کی جانب سے امور کو خوش اسلوبی سے چلانے اور رائس ملز مالکان و اراکین کے مسائل کے حل کے لیے کی جانے والی کوششوں کو سراہتے ہوئے سابق صدر اور دیگر عہدیداران کو خراجِ تحسین پیش کیا گیا۔اجلاس میں متفقہ طور پر سابقہ کابینہ کی تین سالہ مدت مکمل ہونے پر اسے تحلیل کرنے کا فیصلہ کیا گیا، جبکہ ایسوسی ایشن کے نئے انتخابات کے انعقاد کے لیے 8 رکنی الیکشن کمیٹی تشکیل دے دی گئی۔ اجلاس میں موجود تمام ممبران نے الیکشن کمیٹی کے قیام اور اس فیصلے پر اتفاقِ رائے کا اظہار کیا۔اجلاس میں فیصلہ کیا گیا کہ نو تشکیل شدہ الیکشن کمیٹی آئندہ 15 روز کے دوران رائس ملز ایسوسی ایشن کے نئے انتخابات کے حوالے سے مشاورت مکمل کرے گی اور انتخابات کے شیڈول سمیت دیگر امور کو حتمی شکل دے گی، تاکہ ایسوسی ایشن کے نئے عہدیداران کا انتخاب جمہوری اور باہمی مشاورت کے ذریعے عمل میں لایا جا سکے۔نئی الیکشن کمیٹی میں شامل اراکین کے نام درج ذیل ہیں:
1۔ عبدالرحیم جمالی۔ میر حاکم خان جمالی۔ عبدالمجید عمرانی۔ حاجی جان محمد پندرانی۔ سیٹھ گھنشام داس۔ سیٹھ مہیندر کمار۔ سیٹھ لعل چند اور بہادر خان شامل ہیں
اجلاس کے شرکاء نے اس امید کا اظہار کیا کہ نئی الیکشن کمیٹی تمام ممبران سے مشاورت کے بعد شفاف انداز میں انتخابات کا انعقاد یقینی بنائے گی اور نئی کابینہ کے قیام کے بعد رائس ملز ایسوسی ایشن کو مزید فعال اور مضبوط بنانے کے لیے مؤثر اقدامات کیے جائیں گے۔