عازمین حج کے لیے خوشخبری؛ حکومت نے بڑی سہولت فراہم کردی

اسلام آباد: حکومتِ پاکستان نے عازمین حج کے لیے ایک اہم سہولت کا اعلان کرتے ہوئے کہا ہے کہ رواں سال حج کے دوران ہر حاجی کو سعودی عرب میں استعمال کے لیے مفت مقامی سم کارڈ فراہم کیا جائے گا۔
حکام کے مطابق اس اقدام کا مقصد عازمین کو اپنے قیام کے دوران اہلِ خانہ اور متعلقہ اداروں سے آسان رابطہ فراہم کرنا ہے۔ اس سہولت کے تحت حاجیوں کو مفت کالز اور انٹرنیٹ کی سہولت بھی میسر ہوگی۔
تفصیلات کے مطابق لانگ پیکیج (40 دن) کے تحت حج کرنے والے عازمین کو 600 لوکل و انٹرنیشنل منٹس اور 40 جی بی انٹرنیٹ ڈیٹا فراہم کیا جائے گا، جبکہ شارٹ پیکیج کے حاجیوں کو 300 منٹس اور 25 جی بی انٹرنیٹ دیا جائے گا۔ یہ منٹس کال کرنے اور وصول کرنے دونوں کے لیے استعمال کیے جا سکیں گے۔
حکام نے ہدایت کی ہے کہ عازمین صرف حکومت کی جانب سے فراہم کردہ سم کارڈ ہی استعمال کریں اور کسی دوسری سم کی خریداری سے گریز کریں، کیونکہ ایک پاسپورٹ پر صرف ایک سم جاری کی جائے گی اور خلاف ورزی کی صورت میں سرکاری سم بند کی جا سکتی ہے۔
مزید بتایا گیا ہے کہ سم کارڈز حاجیوں کو ان کی رہائش گاہوں پر فراہم کیے جائیں گے، جبکہ ریچارج کوڈ بھی وہیں دستیاب ہوگا۔ بیلنس ختم ہونے کی صورت میں عازمین اضافی ادائیگی کے ذریعے اپنی سم کو ریچارج بھی کر سکیں گے۔