سازگار کمپنی نے ہائبرڈ ایس یو وی متعارف کرنیکا اعلان کر دیا

اسلام آباد: سازگار انجنیئرنگ ورکس نے اپنی نئی ہائبرڈ اسپورٹ یوٹیلیٹی وہیکل (SUV) “Tank-500 Hi4-T 4X4 2.0L Turbo AT” کی آزمائشی پیداوار مارچ 2026 کے اختتام تک شروع کرنے کا اعلان کیا ہے۔

کمپنی کی جانب سے پاکستان اسٹاک ایکسچینج کو دی گئی اطلاع کے مطابق یہ گاڑی CKD ماڈل میں دستیاب ہوگی اور دونوں ورژنز یعنی پلگ اِن ہائبرڈ (PHEV) اور ہائبرڈ (HEV) میں متعارف کرائی جائے گی، جو سازگار کی ہائبرڈ گاڑیوں کے شعبے میں پہلی باقاعدہ انٹری ہے۔

گزشتہ جنوری میں بکنگ کا آغاز کیا گیا تھا، جس میں HEV ورژن کی قیمت 2 کروڑ 5 لاکھ روپے اور PHEV کی قیمت 2 کروڑ 25 لاکھ روپے رکھی گئی تھی، جبکہ بکنگ رقم بالترتیب 30 لاکھ اور 35 لاکھ روپے تھی۔ ماہرین کے مطابق PHEV گاڑیاں بڑی بیٹری کے ساتھ محدود فاصلے تک صرف بجلی پر چل سکتی ہیں، اور بعد میں ہائبرڈ موڈ پر منتقل ہو جاتی ہیں۔

کمپنی نے اپنے چار پہیوں والی گاڑیوں کے پلانٹ کی توسیع مکمل کر لی ہے، جس پر 6.5 ارب روپے خرچ ہوئے، جبکہ ایک جدید خودکار پینٹ شاپ اور دیگر سہولیات کیلئے مزید سرمایہ کاری جاری ہے۔

بورڈ نے 22 ارب روپے کے نئے توسیعی منصوبے کی بھی منظوری دی ہے، جس کے بعد پلانٹ کی سالانہ پیداواری صلاحیت 54 ہزار یونٹس تک پہنچ جائے گی۔