گورنر پنجاب سردار سلیم حیدر خان کا ایچی سن کالج میں بلوچستان کے طلباء کا اسکالرشپ کوٹہ بڑھانے کا اعلان

پنجاب (رپورٹ ۔ شاہد علی مگسی) گورنر پنجاب سردار سلیم حیدر خان سے چودھری نعیم کریم سینئر رہنما مسلم لیگ ( ن) کی قیادت میں بلوچستان سے آئے ہوئے لیڈرز اوڈیسی سکول اینڈ کالج کے طلباء و طالبات کے وفد نے گورنر ہاؤس لاہور میں ملاقات کی۔
ایچی سن کالج میں بلوچستان کے طلباء کا اسکالرشپ کوٹہ بڑھا دیا، ہر سال مزید اضافہ ہوگا

اس موقع پر گفتگو کرتے ہوئے گورنر پنجاب نے کہا کہ ملک دشمن عناصر بلوچستان میں بدامنی اور عدم استحکام پیدا کرنا چاہتے ہیں، تاہم پوری قوم دہشت گردی کے خلاف جنگ میں اپنی بہادر افواج اور سیکیورٹی فورسز کے شانہ بشانہ کھڑی ہے۔
گورنر پنجاب نے اس عزم کا اعادہ کیا کہ ملک کے تمام صوبے ایک اکائی ہیں اور بلوچستان کی ترقی دراصل پورے پاکستان کی ترقی ہے۔سردار سلیم حیدر خان نے نوجوانوں کو ملک کا قیمتی سرمایہ اور مستقبل کے لیڈرز قرار دیتے ہوئے کہا کہ پاکستان پیپلز پارٹی کی قیادت بلوچستان میں ترقیاتی منصوبوں کا جال بچھا رہی ہے۔
اس موقع پر انہوں نے اعلان کیا کہ ایچی سن کالج میں بلوچستان کے طلباء کا اسکالرشپ کوٹہ بڑھا دیا گیا ہے اور اس میں ہر سال مزید اضافہ کیا جائے گا تاکہ زیادہ سے زیادہ طلبا یہاں آ کر اعلیٰ تعلیم حاصل کر سکیں اور ملک کی تعمیر و ترقی میں اپنا بھرپور کردار ادا کر سکیں۔