مدارس کو رجسٹریشن کے نام پر نوٹسز دینا آئین کی خلاف ورزی ہے، مولانا عبدالواسع

جمعیت علما اسلام بلوچستان کے صوبائی امیر سینیٹر مولانا عبدالواسع نے کوئٹہ ویسٹ کے ڈپٹی کمشنر کی جانب سے دینی مدارس کو رجسٹریشن کے نام پر نوٹسز جاری کیے جانے کے عمل پر شدید ردِعمل کا اظہار کرتے ہوئے اسے آئین کی خلاف ورزی اور بلیک میلنگ قرار دیا ہے۔جے یو آئی بلوچستان کے ترجمان دلاور خان کاکڑ کے جاری کردہ بیان کے مطابق صوبائی امیر سینیٹر مولانا عبدالواسع نے کہا کہ مقامی اور ناتجربہ کار افسران کو استعمال کرنے والے عناصر سے پارٹی بخوبی آگاہ ہے۔ مدارس کے خلاف اس قسم کے مضحکہ خیز اقدامات سے دینی مدارس اور ان کے وابستگان کو کسی صورت مرعوب نہیں کیا جا سکتا، کیونکہ مدارس دینِ اسلام اور تعلیم کی ترویج کی خدمات سرانجام دے رہے ہیں۔مولانا عبدالواسع نے نشاندہی کی کہ بلوچستان اسمبلی میں مدارس بل پیش کرنے سے راہِ فرار اختیار کرنے کے بعد اب انتظامی دبا کا سہارا لیا جا رہا ہے۔ انہوں نے واضح کیا کہ مدارس کی رجسٹریشن کی راہ میں اصل رکاوٹ وفاقی و صوبائی حکومتیں خود ہیں، جبکہ مدارس اس عمل میں مکمل طور پر بے قصور ہیں۔انہوں نے مزید کہا کہ مدارس کی خودمختاری، حقوق اور تحفظ پر کوئی سمجھوتہ نہیں کیا جائے گا اور غیر آئینی اقدامات کے ذریعے دبا ڈالنے کی ہر کوشش ناکام ہوگی۔