انٹرنیشنل مارکیٹ میں تیل مہنگا اور سونا سستا ہو گیا

اسلام آباد: عالمی منڈی میں سونے کی قیمتوں میں کمی دیکھی گئی ہے، جس کی بڑی وجہ تیل کی بڑھتی قیمتیں، امریکی ڈالر کی مضبوطی اور شرح سود میں کمی کی توقعات میں کمی ہے۔

اسپاٹ گولڈ 0.6 فیصد کمی کے بعد 4,466 ڈالر فی اونس پر آ گیا، جبکہ ماہانہ بنیاد پر سونا 15 فیصد سے زائد گر چکا ہے، جو 2008 کے بعد سب سے بڑی کمی ہے۔ ماہرین کے مطابق امریکی ڈالر کی مضبوطی بھی سونے کی قیمت کم ہونے کی اہم وجہ ہے۔

توانائی کی بڑھتی قیمتوں کے باعث مہنگائی میں اضافہ ہونے کا خدشہ ہے، جس کی وجہ سے شرح سود کم کرنے کی گنجائش محدود ہو گئی ہے، اور سرمایہ کار اس سال شرح سود میں کمی کے امکانات کم دیکھ رہے ہیں۔

دوسری جانب برینٹ کروڈ آئل کی قیمت 115 ڈالر فی بیرل سے تجاوز کر گئی، جس کی وجہ یمن میں حوثی گروپ کے حملے اور مشرق وسطیٰ میں پھیلتی کشیدگی ہے۔ مارچ کے دوران تیل کی قیمتوں میں تقریباً 60 فیصد اضافہ ریکارڈ کیا گیا۔

دیگر دھاتوں میں چاندی 1.3 فیصد سستی ہوئی، جبکہ پلاٹینم اور پیلیڈیم کی قیمتوں میں معمولی اضافہ دیکھا گیا۔