الیکشن کمیشن کا فیصلہ برقرار ، جے یو آئی کیخلاف وفاقی آئینی عدالت کا حکم آگیا

اسلام آباد: وفاقی آئینی عدالت نے مخصوص نشست کے تنازع پر جمعیت علمائے اسلام (جے یو آئی) کی اپیل مسترد کرتے ہوئے الیکشن کمیشن کا فیصلہ برقرار رکھا ہے۔

چیف جسٹس امین الدین خان اور جسٹس عامر فاروق پر مشتمل دو رکنی بینچ نے کیس کی سماعت کی۔

سماعت کے دوران جے یو آئی کے وکیل نے مؤقف اختیار کیا کہ جماعت نے مخصوص نشستوں کے لیے چار ناموں کی فہرست جمع کرائی تھی، تاہم الیکشن کمیشن مخصوص نشستوں کے لیے امیدواروں کی فہرست میں تبدیلی نہیں کرسکتا۔

وکیل نے عدالت کو بتایا کہ جے یو آئی کا مؤقف ہے کہ صدف احسان جماعت کی امیدوار نہیں ہیں، جبکہ الیکشن کمیشن انہیں جماعت کی امیدوار قرار دے رہا ہے۔ ان کا کہنا تھا کہ اگر سیاسی جماعت کی جانب سے فہرست میں کوئی غلطی ہوئی تھی تو اس کی درستگی کا موقع دیا جانا چاہیے تھا۔

تاہم وفاقی آئینی عدالت نے جے یو آئی کی اپیل خارج کرتے ہوئے الیکشن کمیشن کا فیصلہ برقرار رکھنے کا حکم دے دیا۔