ایف آئی اے پشاور زون میں زونل کرائم کے حوالے سے میٹنگ کا انعقاد کیا گیا

پشاور(نمائندہ خصوصی)گلوبل ٹائمز میڈیا یورپ کے مطابق ایف آئی اے پشاور زون میں زونل کرائم میٹنگ کا انعقاد کیا گیا۔جس کی صدارت ڈائریکٹر ایف آئی اے پشاور زون، انعام اللہ خان گنڈاپور نے کی۔میٹنگ میں ڈپٹی ڈائریکٹر کمرشل بینکنگ سرکل نعیم خان، ڈپٹی ڈائریکٹر اینٹی کرپشن سرکل رانا شاہد حبیب، ڈپٹی ڈائریکٹر اینٹی منی لانڈرنگ سرکل شیخ اعجاز، ڈپٹی ڈائریکٹر کمپوزٹ سرکل مردان ریاض جنجوعہ اور ڈپٹی ڈائریکٹر کمپوزٹ سرکل ایبٹ آباد سردار اللہ بابر نے شرکت کی.میٹنگ کے دوران زون بھر میں جاری انکوائریوں اور مقدمات کی پیش رفت کا تفصیلی جائزہ لیا گیا جبکہ مختلف نوعیت کے جرائم خصوصاً کرپشن، حوالہ ہنڈی، انسانی اسمگلنگ اور بجلی چوری کے خلاف جاری کارروائیوں پر بھی تبادلہ خیال کیا گیا۔ڈائریکٹر ایف آئی اے پشاور زون نے افسران کو ہدایت کی کہ زیرِ تفتیش مقدمات کو میرٹ پر جلد از جلد منطقی انجام تک پہنچایا جائے اور جرائم میں ملوث عناصر کے خلاف قانون کے مطابق بلا امتیاز کارروائی کو یقینی بنایا جائے۔ انہوں نے اس بات پر بھی زور دیا کہ عوامی شکایات کے بروقت ازالے کو یقینی بنایا جائے اور ادارے کی ساکھ کو برقرار رکھنے کے لیے پیشہ ورانہ ذمہ داریوں کو احسن انداز میں انجام دیا جائے۔اس موقع پر ڈائریکٹر ایف آئی اے پشاور زون نے افسران کی کارکردگی کو سراہتے ہوئے کہا کہ ایف آئی اے پشاور زون میں جرائم کے خاتمے اور قانون کی عملداری کو یقینی بنانے کے لیے تمام دستیاب وسائل بروئے کار لائے جائیں گے۔