سونے کی قیمت میں پھر بڑا اضافہ، فی تولہ نرخ کہاں پہنچ گئے؟

کراچی: ملک میں سونے کی قیمت میں ایک بار پھر اضافہ ہوگیا، آل پاکستان جیمز اینڈ جیولرز ایسوسی ایشن نے نئے نرخ جاری کردیے۔

ایسوسی ایشن کے مطابق کاروباری ہفتے کے چوتھے روز فی تولہ سونے کی قیمت میں 600 روپے کا اضافہ ہوا، جس کے بعد سونا 4 لاکھ 35 ہزار 36 روپے کا ہوگیا۔

اسی طرح 10 گرام سونے کی قیمت 515 روپے اضافے کے بعد 3 لاکھ 72 ہزار 973 روپے ہوگئی۔

سونے کی عالمی قیمت پر امریکی ڈالر کی قدر، عالمی معاشی صورتحال، جغرافیائی کشیدگی اور سرمایہ کاروں کے رجحانات سمیت مختلف عوامل اثر انداز ہوتے ہیں۔

ماہرین کے مطابق عالمی سطح پر معاشی یا سیاسی غیر یقینی کی صورتحال میں سرمایہ کار سونے کو محفوظ سرمایہ کاری سمجھتے ہیں، جس کے باعث اس کی طلب اور قیمت میں اضافہ ہوسکتا ہے۔

پاکستان میں عالمی مارکیٹ کے نرخوں کے ساتھ روپے اور امریکی ڈالر کی شرح تبادلہ بھی مقامی صرافہ مارکیٹ میں سونے کی قیمت کے تعین میں اہم کردار ادا کرتی ہے۔