پاکستان کے لیے بڑی خوشخبری

اسلام آباد: پاکستان اور عالمی مالیاتی فنڈ (آئی ایم ایف) کے درمیان قرض پروگراموں کے جائزوں پر اسٹاف لیول معاہدہ طے پا گیا ہے، جس کے بعد ایگزیکٹو بورڈ کی منظوری سے پاکستان کو تقریباً ایک ارب 21 کروڑ ڈالر کی نئی قسط مل سکے گی۔

آئی ایم ایف کے اعلامیے کے مطابق معاہدہ 7 ارب ڈالر کے توسیعی فنڈ سہولت پروگرام (EFF) کے چوتھے جائزے اور موسمیاتی تبدیلی سے متعلق ایک ارب 4 کروڑ ڈالر کے پروگرام (RSF) کے تیسرے جائزے پر ہوا ہے۔

نئی قسط جاری ہونے کے بعد دونوں پروگراموں کے تحت پاکستان کو ملنے والی مجموعی رقم تقریباً 5 ارب 7 کروڑ ڈالر ہوجائے گی۔ پاکستان بیرونی ادائیگیوں اور زرمبادلہ کے ذخائر کو مستحکم رکھنے کے لیے بیرونی فنانسنگ پر انحصار کرتا ہے۔

آئی ایم ایف مشن نے ایوا پیٹرووا کی سربراہی میں 23 ستمبر سے 7 اکتوبر تک پاکستان کا دورہ کیا، جس کے دوران 2026 کی آرٹیکل 4 مشاورت سمیت دونوں پروگراموں کے جائزوں پر مذاکرات کیے گئے۔

آئی ایم ایف نے کہا کہ مشکل عالمی معاشی حالات کے باوجود پاکستان نے پروگرام کے تحت طے شدہ شرائط پر عملدرآمد جاری رکھا۔ فنڈ نے میکرو اکنامک استحکام برقرار رکھنے، سرکاری مالیاتی صورتحال بہتر بنانے، مہنگائی کو ہدف کے مطابق لانے، توانائی کے شعبے میں اصلاحات اور سماجی تحفظ مضبوط بنانے کی کوششوں کو سراہا۔

اعلامیے کے مطابق پاکستان نے موسمیاتی تبدیلی کے اثرات سے نمٹنے اور موسمیاتی خطرات کے مقابلے میں ملک کی استعداد بڑھانے کے لیے بھی اصلاحات میں پیش رفت کی ہے۔

تاہم آئی ایم ایف نے جغرافیائی سیاسی کشیدگی، توانائی کی قیمتوں میں اتار چڑھاؤ، عالمی مالیاتی حالات میں سختی اور تجارتی رکاوٹوں سمیت مختلف خطرات کی نشاندہی بھی کی۔

آئی ایم ایف کے مطابق مالی سال 2026 کی پہلی تین سہ ماہیوں میں پاکستان کی حقیقی جی ڈی پی شرح نمو 4 فیصد رہی، تاہم توانائی کی قیمتوں میں اضافے اور سپلائی میں رکاوٹوں کے باعث پورے مالی سال کی شرح نمو 3.6 فیصد رہنے کا اندازہ ہے۔