عوام کو معیاری طبی سہولیات کی فراہمی یقینی بنائی جائے، مہراللہ بادینی

ڈپٹی کمشنر کوئٹہ مہراللہ بادینی کے زیرِ صدارت ڈسٹرکٹ ہیلتھ کمیٹی کا اجلاس

کوئٹہ: ڈپٹی کمشنر کوئٹہ مہراللہ بادینی کی زیرِ صدارت ڈسٹرکٹ ہیلتھ کمیٹی کا اجلاس منعقد ہوا، جس میں ایڈیشنل ڈپٹی کمشنر (جنرل)، ڈسٹرکٹ ہیلتھ آفیسر، ڈسٹرکٹ منیجر پی پی ایچ آئی، سی ایم او بے نظیر ہسپتال اور ڈرگ کنٹرولر نے شرکت کی۔

اجلاس میں ضلع کوئٹہ کے تمام بنیادی مراکز صحت (BHU) اور رورل ہیلتھ سینٹرز (RHCs) کی حاضری، ادویات کی دستیابی اور دیگر طبی سہولیات سے متعلق رپورٹس پیش کی گئیں۔ متعلقہ افسران نے مراکز صحت کی صورتحال اور درپیش مسائل کے حوالے سے ڈپٹی کمشنر کو بریفنگ دی۔

اس موقع پر ڈرگ کنٹرولر نے رواں ماہ کے دوران کی جانے والی کارروائیوں، خصوصاً غیر رجسٹرڈ اور کھلے دودھ کے خلاف کارروائی، ضبط شدہ دودھ اور دیگر اقدامات کا تفصیلی ڈیٹا بھی اجلاس میں پیش کیا۔

ڈپٹی کمشنر مہراللہ بادینی نے متعلقہ افسران کو ہدایت کی کہ ضلع کے تمام مراکز صحت میں عملے کی حاضری، ادویات کی دستیابی اور عوام کو معیاری طبی سہولیات کی فراہمی یقینی بنائی جائے۔