میرا خیال ہےکہ پاکستان میں انتظامی یونٹس بنائےجائیں، خواجہ آصف

وزیر دفاع خواجہ آصف نے کہا ہے کہ پاکستان میں آبادی میں اضافے اور عوام کو بہتر سہولیات کی فراہمی کے لیے نئے انتظامی یونٹس قائم کیے جانے چاہئیں۔ ان کے مطابق اگر 12 انتظامی یونٹس بنانے کی تجویز ہے تو اس پر عمل کیا جاسکتا ہے، تاہم ان کی تشکیل زبان، نسل یا سیاسی مفادات کی بنیاد پر نہیں ہونی چاہیے۔

سیالکوٹ میں گفتگو کرتے ہوئے خواجہ آصف نے کہا کہ ملک میں نئے صوبوں یا انتظامی یونٹس کا معاملہ گزشتہ دو ماہ سے زیر بحث ہے۔ دنیا کے کئی ممالک میں انتظامی سہولت کے لیے ایسے یونٹس قائم کیے جاتے ہیں، پاکستان میں بھی اس پہلو پر غور ہونا چاہیے۔

وزیر دفاع کا کہنا تھا کہ آبادی بڑھنے کے باعث لوگوں کو ان کی دہلیز پر سہولیات فراہم کرنا ضروری ہے۔ صوبائی دارالحکومتوں میں اختیارات کے ارتکاز کے بجائے انہیں نئے انتظامی یونٹس تک منتقل کیا جانا چاہیے تاکہ لاہور، کراچی، کوئٹہ اور پشاور میں طاقت محدود نہ رہے۔

خواجہ آصف نے کہا کہ مرکز سے صوبوں کو منتقل ہونے والے فنڈز اکثر صوبائی حکومتوں کے اختیار میں رہ جاتے ہیں، حالانکہ ان فنڈز کا اصل مقصد بلدیاتی اداروں کے ذریعے عوام تک سہولیات پہنچانا ہے۔ ان کے بقول بلدیاتی ادارے بھی صوبائی حکومتوں کے رحم و کرم پر ہیں۔

انہوں نے کہا کہ سیاست دانوں کو سمجھنا چاہیے کہ اقتدار اور اختیار عوام کی امانت ہیں، لیکن سیاست دان تمام اختیارات اپنے پاس رکھنا چاہتے ہیں۔