بشریٰ بی بی کا 190 ملین پاؤنڈ کیس میں سزا کیخلاف اپیل کی جلد سماعت کے لیے وفاقی آئینی عدالت سے رجوع

اسلام آباد: 190 ملین پاؤنڈ کیس میں سزا یافتہ بشریٰ بی بی نے سزا معطلی کی اپیل کی جلد سماعت کے لیے وفاقی آئینی عدالت سے رجوع کرلیا۔

درخواست میں مؤقف اختیار کیا گیا ہے کہ بشریٰ بی بی کی آنکھوں کی بیماری دوبارہ لاحق ہوگئی ہے جبکہ جیل میں علاج کی سہولیات بھی ناکافی ہیں۔

درخواست کے مطابق علاج میں مزید تاخیر سے ان کی باقی ماندہ بینائی اور مجموعی صحت متاثر ہونے کا خدشہ ہے۔ درخواست میں یہ بھی کہا گیا ہے کہ اپیل پر فیصلہ نہ ہونے کے باعث مسلسل قید بھی ان کی صحت پر منفی اثر ڈال رہی ہے۔

بشریٰ بی بی کی جانب سے عدالت سے استدعا کی گئی ہے کہ سزا معطلی کی اپیل کو 21 ستمبر 2026 سے شروع ہونے والے ہفتے کے دوران سماعت کے لیے مقرر کیا جائے۔

درخواست میں مؤقف اپنایا گیا کہ طویل اور غیر واضح تاخیر سے بشریٰ بی بی کو پہلے ہی نقصان پہنچ چکا ہے، اس لیے انصاف کے تقاضوں کے پیش نظر اپیل کی جلد سماعت کی جائے۔

واضح رہے کہ سابق وزیراعظم عمران خان کی اہلیہ بشریٰ بی بی کو 190 ملین پاؤنڈ کیس میں جنوری 2025 میں احتساب عدالت نے 7 سال قید کی سزا سنائی تھی۔