بزنس انٹری کیٹیگری میں پاکستان 101 معیشتوں میں 17ویں نمبر پر آگیا

اسلام آباد: پاکستان بزنس انٹری کیٹیگری میں 101 معیشتوں میں 17ویں نمبر پر آگیا ہے، جبکہ سیکیورٹیز اینڈ ایکسچینج کمیشن آف پاکستان (ایس ای سی پی) نے بزنس ریڈی رینکنگ مزید بہتر بنانے کے لیے مختلف اقدامات کی منظوری دے دی۔

ایس ای سی پی کے مطابق بزنس انٹری کیٹیگری میں پاکستان کا اسکور 86.64 ہے۔ کمپنیوں کی رجسٹریشن اور رجسٹریشن کے بعد ہونے والی تبدیلیوں کی معلومات خودکار نظام کے ذریعے ایف بی آر کو دستیاب ہیں۔

ایس ای سی پی، ایف بی آر اور بورڈ آف انویسٹمنٹ اضافی معلومات کے تبادلے کے لیے تعاون کریں گے، جبکہ ماحولیاتی تقاضوں اور اجازت ناموں سے متعلق معلومات کا لنک بھی ایس ای سی پی کی ویب سائٹ پر فراہم کیا جائے گا۔

ایس ای سی پی کے مطابق ایس ایم ایز اور خواتین کاروباری افراد کے لیے حکومتی معاونتی پروگراموں کی معلومات بھی ویب سائٹ پر دستیاب کردی گئی ہیں۔ نئی رجسٹر ہونے والی کمپنیوں سے متعلق صنفی بنیادوں پر اعدادوشمار بھی جاری کیے گئے ہیں، جن میں شیئر ہولڈرز، ڈائریکٹرز، چیف ایگزیکٹوز اور حقیقی مالکان کا ڈیٹا شامل ہے۔

کمیشن کا کہنا ہے کہ ان اقدامات سے شفافیت، معلومات تک رسائی اور اداروں کے درمیان ڈیجیٹل رابطہ کاری بہتر ہوگی، جس سے پاکستان کی بزنس ریڈی کارکردگی اور عالمی رینکنگ میں مزید بہتری کی توقع ہے۔