سینیٹر روبینہ خالد کی چیف سیکرٹری سندھ سے ملاقات

چیئرپرسن BISP سینیٹر روبینہ خالد اور چیف سیکرٹری سندھ سید آصف حیدر شاہ کے درمیان ملاقات
، BISP کے آپریشنل امور اور اقدامات پر تبادلہ خیال

چیئرپرسن بینظیر انکم سپورٹ پروگرام سینیٹر روبینہ خالد اور چیف سیکرٹری سندھ سید آصف حیدر شاہ کے درمیان آج کراچی میں ملاقات ہوئی، جس میں صوبہ سندھ میں BISP کے مختلف آپریشنل امور پر تبادلہ خیال کیا گیا۔
ملاقات کے دوران سندھ میں BISP کے آپریشنز کو مؤثر انداز میں جاری رکھنے اور پروگرام کے اقدامات پر بہتر عملدرآمد سے متعلق امور کا جائزہ لیا گیا۔ چیئرپرسن BISP نے ان چیلنجز کی نشاندہی کی جن کے حل کے لیے صوبائی حکومت کے تعاون کی ضرورت ہے۔
چیف سیکرٹری سندھ نے BISP کو درپیش آپریشنل مسائل کے حل کے لیے سندھ حکومت کی جانب سے مکمل تعاون اور معاونت کی یقین دہانی کرائی۔ انہوں نے کہا کہ صوبائی حکومت سے متعلق تمام امور میں BISP کو ہر ممکن سہولت فراہم کی جائے گی تاکہ مستحقین تک خدمات کی مؤثر فراہمی یقینی بنائی جا سکے۔
مزید برآں، سندھ میں BISP کے اقدامات پر مؤثر اور بلا رکاوٹ عملدرآمد کے لیے باہمی رابطہ اور تعاون مزید مضبوط بنانے کے عزم کا اعادہ کیا گیا۔ اس موقع پر ڈی جی سندھ BISP ثنا اللہ رند اور کنسلٹنٹ نوید خان بھی موجود تھے۔