افغان طالبان بگڑتے تعلقات کی وجوہات تسلیم کرنےکو آمادہ نہیں،کابل کو دہشتگردی روکنےکی ذمہ داری پوری کرنا ہوگی، پاکستان

وزارتِ اطلاعات و نشریات نے افغان طالبان کے ترجمان کے حالیہ بیان پر ردعمل دیتے ہوئے کہا ہے کہ طالبان حکومت بگڑتے دوطرفہ تعلقات کی بنیادی وجوہات تسلیم کرنے پر آمادہ نہیں اور مسلسل پاکستان کی پالیسیوں کو موردِ الزام ٹھہرا رہی ہے۔

وزارتِ اطلاعات کے مطابق پاک افغان تعلقات میں کشیدگی کی بنیادی وجہ افغان سرزمین سے پاکستان کے خلاف دہشتگردی روکنے میں طالبان حکومت کی مسلسل ناکامی ہے۔ کابل اس اہم مسئلے کو نظر انداز کر رہا ہے، جو دونوں ممالک کے تعلقات میں سب سے بڑی رکاوٹ ہے۔

بیان میں کہا گیا ہے کہ افغان طالبان کی الزام تراشی اور کھوکھلی یقین دہانیاں پاک افغان بحران کا حل نہیں۔ کابل کو اپنی سرزمین سے پاکستان کے خلاف دہشتگردی روکنے کی ذمہ داری پوری کرنا ہوگی۔

وزارتِ اطلاعات نے واضح کیا کہ پاکستان اپنی سلامتی کو لاحق خطرات کے خاتمے کے لیے تمام ضروری اقدامات کا حق رکھتا ہے۔ دہشتگردی پاکستان کی ریڈ لائن ہے اور اپنے شہریوں کے تحفظ و سلامتی پر کوئی سمجھوتہ نہیں کیا جاسکتا۔

بیان میں مزید کہا گیا کہ عوام کے تحفظ کے لیے پاکستان کے عزم کو کمزوری نہ سمجھا جائے۔