ایل پی جی قیمتوں میں مزید اضافے کا خدشہ، ایسوسی ایشن کا 16 نومبر سے فروخت بند کرنے کا اعلان

حکومت کی جانب سے ایل پی جی کی قیمتوں کے تعین کے لیے نیا فارمولا متعارف کرانے کے خلاف ایل پی جی ایسوسی ایشنز نے ملک گیر ہڑتال کا اعلان کردیا ہے۔ ہڑتال کے دوران 16 نومبر سے ملک بھر میں ایل پی جی کی فروخت بند رکھنے کا فیصلہ کیا گیا ہے۔

ایل پی جی مارکیٹرز ایسوسی ایشن کے سینئر وائس چیئرمین علی حیدر نے حکومتی پرائسنگ فارمولے کو مسترد کرتے ہوئے کہا ہے کہ تمام متعلقہ ایسوسی ایشنز کے ہنگامی اجلاس میں مشترکہ طور پر ہڑتال کا فیصلہ کیا گیا۔

علی حیدر کے مطابق حکومت کے نئے فارمولے پر عمل درآمد سے ایل پی جی کی قیمتوں میں 25 سے 30 فیصد تک اضافہ ہوسکتا ہے، جس کے باعث ایسوسی ایشنز نے اس طریقہ کار کو قبول کرنے سے انکار کردیا ہے۔

انہوں نے اعلان کیا کہ 16 نومبر سے ملک بھر میں ایل پی جی کی فروخت معطل کردی جائے گی۔