پاکستان نے جموں و کشمیر سے متعلق بھارت کے بے بنیاد دعوے مسترد کردیے

اسلام آباد: پاکستان نے جموں و کشمیر کے حوالے سے بھارت کے بے بنیاد دعووں کو ایک بار پھر مسترد کرتے ہوئے کہا ہے کہ بھارتی مؤقف بین الاقوامی سطح پر تسلیم شدہ حقائق کے منافی ہے۔

ترجمان دفتر خارجہ سفیر سجاد حیدر خان نے جموں و کشمیر کے متنازع خطے کے نقشے سے متعلق بھارتی وزارت خارجہ کے بیان پر ردعمل دیتے ہوئے کہا کہ بھارت کے یکطرفہ اقدامات اور مسلسل قبضہ جموں و کشمیر کی بین الاقوامی طور پر تسلیم شدہ متنازع حیثیت کو تبدیل نہیں کرسکتے۔

ترجمان نے کہا کہ جموں و کشمیر کا تنازع اقوام متحدہ کی سلامتی کونسل کے ایجنڈے پر موجود قدیم اور حل طلب تنازعات میں شامل ہے۔ اقوام متحدہ کی متعلقہ قراردادوں کے مطابق تنازع کا حتمی فیصلہ کشمیری عوام کی خواہشات کے مطابق آزادانہ اور غیرجانبدارانہ رائے شماری کے ذریعے ہونا چاہیے۔

انہوں نے مزید کہا کہ اقوام متحدہ کے سرکاری نقشے جموں و کشمیر کو متنازع علاقے کے طور پر ظاہر کرتے ہیں، جبکہ بھارت کے یکطرفہ نقشے اور خودمختاری کے دعوے اس خطے کی متنازع حیثیت پر کوئی قانونی اثر نہیں رکھتے۔

پاکستان نے عالمی برادری پر زور دیا کہ وہ بھارت سے مقبوضہ جموں و کشمیر میں انسانی حقوق کی خلاف ورزیاں فوری طور پر روکنے اور کشمیری عوام کے حقِ خودارادیت سے متعلق اقوام متحدہ کی سلامتی کونسل کی قراردادوں پر عمل درآمد یقینی بنانے کا مطالبہ کرے۔