معاشی اصلاحات کے ثمرات؛ پاکستان میں سرمایہ کاری، روزگار اور عوامی اعتماد بہتر

اسلام آباد: پاکستان میں معاشی استحکام کے مثبت اثرات سامنے آنے لگے ہیں، جہاں صارفین کے اعتماد، سرمایہ کاری اور معاشی صورتحال سے متعلق مختلف اشاریوں میں بہتری ریکارڈ کی گئی ہے۔

عالمی مارکیٹ ریسرچ کمپنی آئی پی ایس او ایس کے کنزیومر کانفیڈنس انڈیکس سروے کے مطابق پاکستان میں صارفین کے مجموعی اعتماد کا انڈیکس 0.4 پوائنٹس اضافے کے بعد 33.6 کی سطح پر پہنچ گیا ہے۔

سروے کے مطابق پاکستان کو درست سمت میں گامزن سمجھنے والے افراد کی شرح اگست 2024 کے 11 فیصد سے بڑھ کر 24 فیصد ہوگئی، جبکہ معاشی بہتری کی امید رکھنے والوں کی شرح بھی 12 فیصد سے بڑھ کر تقریباً 23 فیصد تک پہنچ گئی ہے۔

رپورٹ میں بتایا گیا ہے کہ ضروری گھریلو اشیا کی معمول کی خریداری پر اطمینان 3 فیصد اضافے کے بعد 10 فیصد ہوگیا، جبکہ گھر یا گاڑی جیسی بڑی خریداری کے لیے صارفین کا اعتماد بھی 2 فیصد بڑھ کر 7 فیصد تک پہنچ گیا۔

سروے کے مطابق پاکستان میں سرمایہ کاری پر اعتماد 15 فیصد کی سطح پر ہے اور گزشتہ ایک سال کے دوران مجموعی طور پر مستحکم رہا۔ معاشی صورتحال، روزگار اور سرمایہ کاری سے متعلق گلوبل کنزیومر کانفیڈنس انڈیکس میں بھی پاکستان کی صورتحال بہتر ہوئی ہے۔