پاکستان مستقبل کی ٹیکنالوجی اور ڈیجیٹل معیشت کیلئے تیار ہے، بلال بن ثاقب

ہانگ کانگ: وزیر مملکت و چیئرمین پاکستان ورچوئل ایسٹس ریگولیٹری اتھارٹی بلال بن ثاقب نے کہا ہے کہ پاکستان مستقبل کی ٹیکنالوجی اور ڈیجیٹل معیشت کے لیے خود کو تیار کر رہا ہے۔

ہانگ کانگ میں بٹ کوائن ایشیا کانفرنس سے خطاب کرتے ہوئے انہوں نے کہا کہ پاکستان نئی مالیاتی اور تکنیکی تبدیلیوں کو سمجھنے اور ان سے فائدہ اٹھانے کے لیے اپنی صلاحیتوں میں اضافہ کر رہا ہے۔

بلال بن ثاقب کے مطابق پاکستان نے 6 ماہ سے بھی کم عرصے میں ورچوئل اثاثہ جات کے لیے ریگولیٹری نظام قائم کیا، جبکہ اس نظام کی تشکیل اور فعالیت پر تقریباً 2 لاکھ ڈالر خرچ ہوئے۔

انہوں نے بتایا کہ منظور شدہ بجٹ کا تقریباً 92 فیصد حصہ استعمال نہیں کیا گیا، جس سے کم اخراجات میں ریگولیٹری نظام قائم کرنے کا اندازہ ہوتا ہے۔

ان کا کہنا تھا کہ پاکستان کا مقصد بڑی مقدار میں بٹ کوائن خرید کر اسٹریٹجک ریزرو بنانا نہیں بلکہ ملک کو مستقبل کے مالیاتی نظام اور ڈیجیٹل معیشت کے لیے تیار کرنا ہے۔