نیپرا کے نئے کارکردگی قوانین، بجلی کی تقسیم کار کمپنیوں پر شکنجہ سخت

اسلام آباد: نیشنل الیکٹرک پاور ریگولیٹری اتھارٹی (نیپرا) نے بجلی کی تقسیم کار کمپنیوں کے لیے کارکردگی کے نئے اور وسیع معیار متعارف کرا دیے ہیں، جس کے تحت کمپنیوں کی نگرانی اور جواب دہی کا نظام مزید سخت ہوگا۔

نئے ضوابط کے تحت تقسیم کار کمپنیوں کی کارکردگی کو بجلی کی قابلِ اعتماد فراہمی، صارفین کو خدمات، سرمایہ کاری، حفاظتی اقدامات اور جدید ٹیکنالوجی کے استعمال سمیت مختلف شعبوں میں جانچا جائے گا۔

نیپرا کے نئے پرفارمنس اسٹینڈرڈز (ڈسٹری بیوشن) ریگولیشنز 2026 نے 2005 میں متعارف کرائے گئے پرانے کارکردگی فریم ورک کی جگہ لے لی ہے۔

نئے نظام کے ذریعے بجلی کی تقسیم کار کمپنیوں کی کارکردگی کو زیادہ جامع اور قابلِ پیمائش انداز میں جانچنے کے ساتھ ساتھ صارفین کو فراہم کی جانے والی خدمات کے معیار میں بہتری لانے پر بھی توجہ دی جائے گی۔

نئے ضوابط کے تحت بجلی کی فراہمی میں بہتری، سرمایہ کاری، حفاظتی معیار اور جدید ٹیکنالوجی کے استعمال سے متعلق کمپنیوں کی کارکردگی کو باقاعدہ طور پر جانچا جائے گا۔