پائیدار امن عوام کے روشن اور خوشحال مستقبل کی بنیادی شرط ہے: وزیراعظم شہباز شریف

اسلام آباد: وزیراعظم شہباز شریف نے مکہ مشترکہ دفاعی معاہدے پر امریکی صدر ڈونلڈ ٹرمپ کے مثبت بیان کا خیرمقدم کرتے ہوئے کہا ہے کہ پائیدار امن عوام کے روشن اور خوشحال مستقبل کے لیے بنیادی شرط ہے۔

وزیراعظم شہباز شریف نے اپنے سوشل میڈیا پیغام میں کہا کہ وہ مکہ مشترکہ دفاعی معاہدے پر دستخط کے حوالے سے صدر ٹرمپ کے حمایت بھرے اور حوصلہ افزا کلمات کو قدر کی نگاہ سے دیکھتے ہیں۔

انہوں نے کہا کہ پاکستان برادر ممالک سعودی عرب اور ترکیہ کے ساتھ مل کر نہ صرف اپنے دوست ممالک بلکہ پورے خطے کے دفاع اور امن و استحکام کے لیے تعمیری کردار ادا کرتا رہے گا۔

وزیراعظم نے امریکی صدر ڈونلڈ ٹرمپ کی قیادت کو سراہتے ہوئے کہا کہ ان کے اقدامات نے جنوبی ایشیا میں ایک بڑے بحران کو روکنے اور لاکھوں جانیں بچانے میں کردار ادا کیا۔

شہباز شریف کا کہنا تھا کہ امن، استحکام اور باہمی تعاون ہی خطے کے عوام کے بہتر مستقبل کی ضمانت ہیں۔

واضح رہے کہ امریکی صدر ڈونلڈ ٹرمپ نے سعودی عرب، ترکیہ اور پاکستان کے درمیان ہونے والے مکہ دفاعی معاہدے کو خوش آئند قرار دیتے ہوئے اسے ایک اہم اور جرات مندانہ قدم قرار دیا تھا۔

دوسری جانب ترکیہ کے صدر رجب طیب اردوان نے بھی کہا ہے کہ مصر مکہ مشترکہ دفاعی معاہدے میں شامل ہونے میں دلچسپی رکھتا ہے۔