سابق وزیراعظم آزاد کشمیر سردار تنویر الیاس کے قافلے پر فائرنگ، سیکیورٹی گارڈ جاں بحق، متعدد زخمی

پلندری: آزاد کشمیر کے سابق وزیراعظم سردار تنویر الیاس کے قافلے پر فائرنگ کا واقعہ پیش آیا ہے، جس کے نتیجے میں ان کا ایک سیکیورٹی گارڈ جاں بحق جبکہ متعدد افراد زخمی ہوگئے۔

ذرائع کے مطابق سردار تنویر الیاس اپنے دو روزہ دورے کے لیے راؤلاکوٹ جا رہے تھے کہ راستے میں ٹائیں ڈھلکوٹ کے مقام پر نامعلوم افراد نے ان کے قافلے کو نشانہ بنایا۔

فائرنگ کے باعث قافلے میں شامل کئی گاڑیوں کے شیشے ٹوٹ گئے، جبکہ سابق معاون خصوصی سردار امتیاز شاہین کے زخمی ہونے کی اطلاعات بھی سامنے آئی ہیں۔

واقعے میں جاں بحق ہونے والے سیکیورٹی گارڈ سردار آصف یوسف کا تعلق کوٹیڑہ گوراہ پلندری سے بتایا جا رہا ہے۔ ذرائع کے مطابق وہ کچھ عرصہ قبل وزیراعظم پاکستان کی سیکیورٹی ڈیوٹی سے ریٹائر ہوئے تھے اور بعد ازاں سردار تنویر الیاس کی ذاتی سیکیورٹی پر تعینات تھے۔

واقعے کے بعد سیکیورٹی اداروں نے علاقے میں کارروائی شروع کر دی ہے جبکہ مزید تحقیقات جاری ہیں۔