بجلی کی قیمت میں اضافے کا امکان، کراچی سمیت ملک بھر کے صارفین متاثر ہونے کا خدشہ

اسلام آباد: کراچی سمیت ملک بھر کے بجلی صارفین کے لیے فی یونٹ قیمت میں اضافے کا امکان پیدا ہوگیا ہے۔ سینٹرل پاور پرچیزنگ ایجنسی (سی پی پی اے) نے بجلی مہنگی کرنے کے لیے نیپرا میں درخواست جمع کرا دی ہے۔

درخواست میں جون کی ماہانہ فیول ایڈجسٹمنٹ کی مد میں بجلی کی قیمت میں 1 روپے 20 پیسے فی یونٹ اضافے کی استدعا کی گئی ہے۔

نیپرا کی جانب سے درخواست پر سماعت 29 جولائی کو اسلام آباد میں کی جائے گی، جس کے بعد بجلی کی قیمت میں اضافے سے متعلق حتمی فیصلہ کیا جائے گا۔

اگر درخواست منظور کر لی جاتی ہے تو اس کا اثر کراچی سمیت ملک بھر کے بجلی صارفین کے بلوں پر پڑنے کا امکان ہے۔