کوئٹہ سے اسلام آباد کا فضائی کرایہ ایک لاکھ 20 ہزار روپے تک پہنچ گیا، پی آئی اے اور نجی ایئر لائنز کی لوٹ مار جاری

صوبائی دارالحکومت کوئٹہ اور وفاقی دارالحکومت اسلام آباد کے درمیان فضائی سفر کے کرایوں میں ہونے والے ہوشربا اور غیر معمولی اضافے نے بلوچستان کے عوام، کاروباری حلقوں، سرکاری ملازمین، طلبہ اور علاج کی غرض سے سفر کرنے والے غریب مریضوں کو شدید ترین مشکلات سے دوچار کر دیا ہے۔ مسافروں اور عوامی حلقوں کا کہنا ہے کہ گزشتہ چند ماہ بالخصوص عید کے دنوں میں فضائی کرایوں میں مسلسل بے لگام اضافہ دیکھنے میں آیا ہے، جس کے باعث اب ہوائی سفر غریب اور مڈل کلاس تو دور کی بات، اچھے بھلے کھاتے پیتے عام آدمی کی پہنچ سے بھی کوسوں دور ہوتا جا رہا ہے۔خبر رساں ادارے “یو این اے” کی رپورٹ کے مطابق، قومی فضائی کمپنی پی آئی اے (PIA) کی جانب سے کوئٹہ سے اسلام آباد اور واپسی کے لیے ایک طرفہ (One-Way) ٹکٹ کے نرخ بعض اوقات 80 ہزار روپے سے بڑھا کر ایک لاکھ 20 ہزار روپے تک پہنچا دیے گئے ہیں۔ مسافروں کا کہنا ہے کہ عیدین، سرکاری تعطیلات، ہنگامی حالات اور پروازوں کی محدود تعداد کا فائدہ اٹھا کر یہ مافیا کرایوں میں مزید اضافہ کر دیتا ہے، جس سے عوام کی مجبوریاں کئی گنا بڑھ جاتی ہیں۔ دوسری جانب، نجی ایئرلائنز بھی اس روٹ پر بہتی گنگا میں ہاتھ دھو رہی ہیں اور ان کے ایک طرفہ ٹکٹ کے نرخ 65 ہزار سے لے کر 90 ہزار روپے تک وصول کیے جا رہے ہیں۔ شہریوں کے مطابق، نجی کمپنیوں کی آمد سے امید تھی کہ مقابلے کی فضا پیدا ہونے سے کرائے سستے ہوں گے، لیکن یہاں سب مل کر عوام کو دونوں ہاتھوں سے لوٹ رہے ہیں۔تعلیمی اور سماجی حلقوں کا کہنا ہے کہ بلوچستان رقبے کے لحاظ سے پاکستان کا سب سے بڑا صوبہ ہے، جہاں زمینی سفر انتہائی طویل، تھکا دینے والا اور بعض اوقات خراب موسمی و سیکیورٹی حالات کے باعث شدید دشوار گزار ہو جاتا ہے۔ ایسی صورتحال میں کوئٹہ سے اسلام آباد، راولپنڈی اور دیگر بڑے شہروں میں زیرِ تعلیم طلبہ، سرکاری ملازمین، کاروباری افراد اور وہ لاچار مریض جو وفاقی دارالحکومت کے ہسپتالوں کا رخ کرتے ہیں، ان کے پاس فضائی سفر کے علاوہ کوئی چارہ نہیں ہوتا، مگر موجودہ کرائے اب ان کے لیے ناقابلِ برداشت اور کمر توڑ ہو چکے ہیں۔سفری شعبے (ٹریول ایجنٹس) سے وابستہ افراد اور مسافروں کے لیے سب سے دلچسپ اور حیران کن امر یہ ہے کہ عیدِ قربان کے موقع پر بھی کوئٹہ سے بیرونِ ملک کا سفر، اندرونِ ملک کے سفر کے مقابلے میں انتہائی سستا دکھائی دے رہا ہے۔ اعداد و شمار کے مطابق، غیر ملکی فضائی کمپنی “فلائی دبئی” کے ذریعے کوئٹہ سے دبئی کا بین الاقوامی ٹکٹ صرف 30 ہزار سے 36 ہزار روپے کے درمیان باآسانی دستیاب ہے، جبکہ اس کے برعکس اپنے ہی ملک کے اندر کوئٹہ سے اسلام آباد کا سفر اس سے 3 سے 4 گنا زیادہ مہنگا ریکارڈ کیا جا رہا ہے۔ اس مضحکہ خیز اور سنگین صورتحال پر عوامی و شہری حلقوں نے شدید تشویش کا اظہار کرتے ہوئے وفاقی حکومت، وزیرِ ہوا بازی اور وزیراعلی بلوچستان سے پرزور مطالبہ کیا ہے کہ کوئٹہ اسلام آباد روٹ پر پروازوں کی تعداد میں فوری اضافہ کیا جائے اور پی آئی اے سمیت تمام نجی ایئرلائنز کے من مانے کرایوں کو لگام دے کر عوام کو فوری ریلیف فراہم کیا جائے۔

Browse Posts

اسسٹنٹ کمشنر کشمور شاہ رخ کا مختلف فلور ملز کا دورہ، گندم کے ذخائر کا جائزہ

جمعیت علماء اسلام کے عوامی اجتماعات میں جوق در جوق شرکت عوامی حمایت اور اعتماد کا واضح ثبوت ہے، مولانا عبدالرحمن رفیق

گوادر: پاک ایران سرحد پر تجارتی سرگرمیاں متاثر، ایل پی جی بحران کا خدشہ