امت مسلمہ کو مشترکہ حکمتِ عملی اپنانا ہوگی، مولانا فضل الرحمان

لاہور(م ڈ) جمعیت علمائے اسلام (ف) کے سربراہ مولانا فضل الرحمان نے کہا ہے کہ امت مسلمہ کو موجودہ عالمی حالات کے تناظر میں سر جوڑ کر بیٹھنا اور اپنا مشترکہ مستقبل طے کرنا ہوگا امریکا اور یورپ کے ساتھ بعض ممالک کی دوستی کے نتائج آج پوری امت مسلمہ کے سامنے آ رہے ہیں۔لاہور میں گفتگو کرتے ہوئے مولانا فضل الرحمان نے کہا کہ بیت المقدس اور فلسطین کا مسئلہ کسی ایک ملک، خصوصاً ایران کا نہیں بلکہ پوری امت مسلمہ کا مشترکہ مسئلہ ہے۔ انہوں نے زور دیا کہ مسلم دنیا کو اس معاملے پر متحد ہو کر واضح حکمت عملی اختیار کرنا ہوگی۔انہوں نے ملکی صورتحال پر تشویش کا اظہار کرتے ہوئے مطالبہ کیا کہ پارلیمنٹ کا ان کیمرا اجلاس بلایا جائے تاکہ قومی معاملات پر سنجیدگی سے غور کیا جا سکے اور مستقبل کے حوالے سے جامع لائحہ عمل طے کیا جا سکے۔مولانا فضل الرحمان کا کہنا تھا کہ ہمیں پاکستان اور اس کے مستقبل کے بارے میں سنجیدگی سے سوچنا ہوگا اور قومی اتحاد کے ساتھ آگے بڑھنا ہوگا۔