پاکستان ایشیائی ترقیاتی بینک سے 50 کروڑ ڈالرکے مساوی نیا قرض لےگا: حکام وزارت خزانہ

اسلام آباد: وزارت خزانہ کے حکام نے اعلان کیا ہے کہ پاکستان ایشیائی ترقیاتی بینک (ADB) سے 50 کروڑ ڈالر کے مساوی نیا قرض لے گا۔

حکام کے مطابق یہ قرض سرکاری پنشن نظام میں اصلاحات کے لیے لیا جائے گا، کیونکہ وفاقی حکومت کا سالانہ پنشن بل 1055 ارب روپے تک پہنچ چکا ہے۔ نئے قرض کا مقصد پنشن اخراجات پر قابو پانا اور نظام کو پائیدار بنانا ہے۔

منصوبے کا نام ٹرانسفارمنگ پبلک سیکٹر پنشن پروگرام رکھا گیا ہے، جس کے تحت سرکاری اداروں کے لیے تربیتی اور آگاہی پروگرام بھی شروع کیے جائیں گے۔

وزارت خزانہ کے حکام نے بتایا کہ نئی اصلاحات سے پنشن نظام کی گورننس اور نگرانی مضبوط ہوگی، مستقبل کے مالی بوجھ میں کمی آئے گی، اور نظام زیادہ شفاف اور مستحکم بنایا جائے گا۔

حکام کا کہنا ہے کہ طے شدہ کنٹری بیوٹری پنشن اسکیم کی بھی بہتر نگرانی کی جائے گی اور سرکاری ملازمین کے لیے نیا اور پائیدار پنشن نظام متعارف کرایا جائے گا۔