پاکستان اسٹاک ایکسچینج میں تیزی کا رجحان

پاکستان اسٹاک ایکسچینج میں آج تیزی کا رجحان دیکھنے میں آیا ہے جہاں ہنڈریڈ انڈیکس نمایاں اضافے کے ساتھ ایک لاکھ 64 ہزار 663 پوائنٹس کی سطح تک پہنچ گیا۔ کاروبار کے دوران انڈیکس میں مجموعی طور پر 3903 پوائنٹس کا اضافہ ریکارڈ کیا گیا۔

ٹریڈنگ کے دوران کے ایس ای 100 انڈیکس بتدریج اوپر جاتا رہا، پہلے ایک لاکھ 64 ہزار 322 پوائنٹس، پھر 1 لاکھ 64 ہزار 494 پوائنٹس اور بعد ازاں 1 لاکھ 64 ہزار 663 پوائنٹس کی بلند سطح پر پہنچ گیا۔

یاد رہے کہ اس سے قبل مارکیٹ میں شدید مندی دیکھنے میں آئی تھی، جہاں کاروباری ہفتے کے آغاز پر ہی 4795 پوائنٹس کی بڑی کمی ریکارڈ کی گئی تھی اور انڈیکس کم ہو کر ایک لاکھ 62 ہزار 396 پوائنٹس پر آ گیا تھا۔ بعد ازاں مندی کا سلسلہ جاری رہا اور انڈیکس مزید گر کر 1 لاکھ 61 ہزار 757 پوائنٹس تک پہنچ گیا تھا۔

تاہم حالیہ دنوں میں بین الاقوامی سطح پر مثبت پیش رفت، خصوصاً امریکا اور ایران کے درمیان کشیدگی میں کمی، اسلام آباد میں جنگ بندی سے متعلق مذاکرات کی امیدیں اور عالمی منڈی میں خام تیل کی قیمتوں میں استحکام جیسے عوامل کے باعث نہ صرف ایشیائی مارکیٹس بلکہ پاکستان اسٹاک ایکسچینج میں بھی تیزی کا رجحان دیکھنے میں آ رہا ہے۔