آبنائے ہرمز بند رہنے کے باوجود ٹرمپ ایران جنگ ختم کرنے کیلئے تیار، وال اسٹریٹ جرنل

واشنگٹن (ویب ڈیسک) امریکی صدر ڈونلڈ ٹرمپ نے ایران سے جاری کشیدگی کے تناظر میں عندیہ دیا ہے کہ وہ آبنائے ہرمز بند رہنے کے باوجود جنگ کے خاتمے کے لیے تیار ہیں۔

میڈیا رپورٹس کے مطابق وال اسٹریٹ جرنل نے ٹرمپ انتظامیہ کے حکام کے حوالے سے بتایا ہے کہ صدر ٹرمپ نے اپنے معاونین کو ہدایت دی ہے کہ ایران کے ساتھ تنازع کے خاتمے کے لیے سفارتی راستہ اختیار کیا جائے، چاہے آبنائے ہرمز فوری طور پر بحال نہ بھی ہو۔

حکام کا کہنا ہے کہ ٹرمپ اور ان کی ٹیم کے نزدیک آبنائے ہرمز کو کھولنے کے لیے مزید فوجی کارروائیاں تنازع کو طویل کر سکتی ہیں اور یہ عمل چار سے چھ ہفتوں کی موجودہ ٹائم لائن سے بھی آگے بڑھ سکتا ہے، اسی لیے فوجی آپشن ترجیح نہیں۔

رپورٹ کے مطابق امریکی حکمت عملی میں ایران کی بحری اور میزائل صلاحیت کو محدود کرنے کے بعد تہران پر سفارتی دباؤ بڑھانا شامل ہے تاکہ آبنائے ہرمز کو دوبارہ کھولا جا سکے اور کشیدگی کا خاتمہ ممکن ہو۔

دوسری جانب صدر ٹرمپ نے خبردار کیا ہے کہ اگر 48 گھنٹوں میں آبنائے ہرمز نہ کھولی گئی تو ایران کے بنیادی انفراسٹرکچر کو نشانہ بنایا جا سکتا ہے، جبکہ امریکا اپنے اتحادیوں پر بھی دباؤ ڈال سکتا ہے۔