وزیر خارجہ اسحاق ڈار ایک روزہ اہم دورے پر چین روانہ

اسلام آباد/بیجنگ (ویب ڈیسک) نائب وزیر اعظم و وزیر خارجہ اسحاق ڈار ایک روزہ اہم دورے پر چین روانہ ہو گئے ہیں جہاں وہ چینی ہم منصب سے ملاقات کریں گے۔

دفتر خارجہ کے ترجمان کے مطابق یہ دورہ چینی وزیر خارجہ کی دعوت پر ہو رہا ہے، جس کے دوران دونوں رہنما پاک چین دوطرفہ تعلقات، باہمی دلچسپی کے امور اور مختلف شعبوں میں تعاون کا جائزہ لیں گے۔

ترجمان کا کہنا ہے کہ ملاقات میں خطے کی مجموعی صورتحال اور عالمی حالات پر بھی تفصیلی تبادلہ خیال کیا جائے گا۔ رواں سال کے دوران وزیر خارجہ اسحاق ڈار کا یہ بیجنگ کا دوسرا دورہ ہے۔

دفتر خارجہ کے مطابق پاکستان اور چین کے درمیان ہر موسم میں قائم رہنے والی اسٹریٹجک شراکت داری موجود ہے، جس میں علاقائی و عالمی امور پر قریبی رابطہ اور مسلسل مشاورت شامل ہے۔

ذرائع کے مطابق اسحاق ڈار کندھے کے فریکچر کے باوجود اس اہم دورے پر روانہ ہوئے، جو دونوں ممالک کے تعلقات کی اہمیت کو ظاہر کرتا ہے۔