ترکیہ اور مصر کے بعد سعودی وزیر خارجہ بھی پاکستان پہنچ گئے، اہم بیٹھک کچھ دیر بعد شروع ہوگی

اسلام آباد: مشرق وسطیٰ میں جاری کشیدگی کم کرنے کے لیے آج اسلام آباد میں ایک اہم چار فریقی اجلاس ہو گا، جس میں پاکستان، سعودی عرب، مصر اور ترکیہ کے وزرائے خارجہ شریک ہوں گے۔

سعودی وزیر خارجہ فرحان بن فیصل بھی خصوصی طیارے کے ذریعے اسلام آباد کے نور خان ائیر بیس پہنچ گئے ہیں۔ اجلاس کی صدارت پاکستان کے نائب وزیراعظم و وزیر خارجہ سینیٹر اسحاق ڈار کریں گے۔ سعودی وزیر خارجہ کا یہ دورہ مشرق وسطیٰ میں کشیدگی کے پیش نظر نہایت اہمیت کا حامل ہے۔

Browse Posts

سردار وقاص شہزاد کا جنوبی افریقہ کے ہائی کمشنر روڈولف پیئر جورڈان سے ملاقات

وزیراعظم کی سربراہی میں پاکستان ترقی کی راہ پر گامزن ہے،شازیہ جدون

اکرام الدین کا عامر سلطان ترین کو وزیر اعلی کے پی کے پرنسپل سیکرٹری مقرر ہونے پر مبارک

قبل ازیں نائب وزیراعظم اسحاق ڈار نے دفتر خارجہ میں ترکیہ کے وزیر خارجہ ہاکان فدان اور مصر کے وزیر خارجہ ڈاکٹر بدر عبدالعاطی سے علیحدہ علیحدہ ملاقاتیں کیں۔ ملاقاتوں میں خطے کی کشیدہ صورتحال اور باہمی دلچسپی کے امور پر اہم مشاورت کی گئی۔

اسحاق ڈار نے ترکیہ کے وزیر خارجہ سے ملاقات میں پاکستان اور ترکیہ کے تاریخی، برادرانہ اور مضبوط تعلقات کو اجاگر کیا اور کہا کہ دونوں ممالک کے روابط مشترکہ تاریخ، ثقافت اور باہمی احترام پر مبنی ہیں۔ پاک-ترک وزرائے خارجہ نے مختلف شعبوں میں تعاون کو مزید فروغ دینے کے عزم کا اعادہ کیا اور اسٹریٹجک شراکت داری کو مضبوط بنانے کے امکانات پر تبادلہ خیال کیا۔

مصر کے وزیر خارجہ کے ساتھ ملاقات میں دونوں رہنماؤں نے حالیہ اعلیٰ سطح تبادلوں، تجارت، سرمایہ کاری، صحت کے شعبے میں تعاون، اور دفاعی و سلامتی کے امور کا جائزہ لیا۔ انہوں نے فلسطینی عوام کے لیے پاکستان کی غیر متزلزل حمایت کا اعادہ کیا اور غزہ میں انسانی امداد فراہم کرنے میں مصر کے کردار کو سراہا۔

اجلاس میں خطے میں امن و استحکام، تحمل اور کشیدگی میں کمی کے لیے بات چیت اور سفارت کاری کی اہمیت پر زور دیا گیا اور مشترکہ کوششوں کے ذریعے تعلقات کو مزید مضبوط بنانے کا عزم ظاہر کیا گیا۔