پاکستان کیساتھ تمام مسائل افہام وتفہیم کے ذریعے حل کرنا چاہتے ہیں ،افغان وزیر خارجہ

کابل: افغانستان کی عبوری حکومت کے وزیر خارجہ مولوی امیر متقی نے پاکستان کے ساتھ تعلقات میں بہتری کی خواہش کا اظہار کیا ہے۔

امیر متقی نے متحدہ عرب امارات کے نائب وزیر اعظم اور وزیر خارجہ عبداللہ بن زاید النہیان کے ساتھ ٹیلیفونک رابطے میں دو طرفہ تعلقات، افغانستان اور امریکا کے درمیان مسائل، علاقائی صورتحال، اور پاکستان کے ساتھ حالیہ پیش رفت پر تبادلہ خیال کیا۔

انہوں نے کہا کہ افغانستان اور پاکستان کے درمیان تمام مسائل کو بات چیت اور باہمی افہام و تفہیم کے ذریعے حل کیا جانا چاہیے۔ مولوی امیر متقی نے واضح کیا کہ افغانستان ایک ذمہ دار ہمسایہ ملک کے طور پر خطے میں استحکام چاہتا ہے اور کسی کو بھی اجازت نہیں دی جائے گی کہ افغانستان کی سرزمین کو پاکستان کے خلاف استعمال کرے۔