کفایت شعاری؛ رواں مالی سال کے ترقیاتی بجٹ سے 100 ارب روپے کی بڑی کٹوتی

اسلام آباد: وفاقی حکومت نے مالیاتی استحکام اور کفایت شعاری کی پالیسی کے تحت پی ایس ڈی پی کے ترقیاتی منصوبوں کے بجٹ میں 10 فیصد کمی کا فیصلہ کیا ہے۔

وفاقی وزیر برائے منصوبہ بندی احسن اقبال کے مطابق وزارت خزانہ کی ہدایت کے مطابق پی ایس ڈی پی میں شامل تمام منصوبوں سے 100 ارب روپے کی کٹوتی کی گئی ہے، جس کے بعد رواں مالی سال کے لیے وفاقی ترقیاتی بجٹ 900 ارب روپے رہ گیا ہے۔

حکومت کا کہنا ہے کہ یہ اقدام عوام پر پیٹرولیم مصنوعات کے اضافی بوجھ کو منتقل نہ کرنے اور مالیاتی نظم و ضبط قائم رکھنے کے لیے کیا گیا ہے۔ یاد رہے کہ پہلے ہی حکومت نے پیٹرول اور ڈیزل پر 72 ارب روپے کی سبسڈی دے کر عوام کو ریلیف فراہم کیا ہے۔