کوئٹہ پولیس نے کم عمر لڑکوں کو بلیک میل کرنے والے 3 ملزمان کو گرفتار کر لیا

صوبائی دارالحکومت کوئٹہ میں پولیس نے کارروائی کرتے ہوئے کم عمر لڑکوں کو مبینہ طور پر بلیک میل اور جنسی استحصال کا نشانہ بنانے والے 3 رکنی گروہ کو گرفتار کر لیا ہے۔ڈی آئی جی کوئٹہ عمران شوکت، ایس ایس پی آپریشنز کوئٹہ ضیا مندوخیل، ایس پی صدر شفقت جنجوعہ اور ڈی ایس پی صدر سرکل شوکت جدون کی ہدایت پر ایس ایچ او تھانہ بروری نصیب اللہ ناصر نے پولیس ٹیم کے ہمراہ کارروائی کرتے ہوئے تینوں ملزمان کو گرفتار کیا۔ گرفتار ملزمان میں عامر احمد ولد برات خان(سکنہ نواں کلی)، نعمان ولد محمد رسول(سکنہ نواں کلی)اور حکمت اللہ ولد یار محمد (سکنہ اتحاد کالونی)شامل ہیں۔ابتدائی تفتیش کے مطابق ملزمان سوشل میڈیا اور موبائل فون کے ذریعے کم عمر لڑکوں سے رابطہ قائم کر کے انہیں مختلف مقامات پر بلاتے تھے، جہاں ان کی ویڈیوز بنا کر انہیں بلیک میل اور جنسی استحصال کا نشانہ بنایا جاتا تھا۔پولیس نے ملزمان کے خلاف باقاعدہ مقدمہ درج کر کے قانونی کارروائی اور مزید تفتیش شروع کر دی ہے تاکہ واقعے کے دیگر پہلوں اور ممکنہ متاثرین کا سراغ لگایا جا سکے۔ حکام کے مطابق بچوں کے تحفظ اور بلیک میلنگ جیسے سنگین جرائم میں ملوث عناصر کے خلاف بلاامتیاز کارروائیاں جاری رہیں گی۔