31 اکتوبر کو سریاب میں عظیم الشان ختم نبوت کانفرنس منعقد ہوگی، جمعیت علماء اسلام

کوئٹہ()
جمعیت علماء اسلام حلقہ سریاب عبید اللہ سندھی یونٹ کے امیر مولانا عطاء اللہ رحمانی، جنرل سیکرٹری مفتی نیاز محمد، سرپرست اعلیٰ مفتی ممتاز احمد عثمانی ودیگر نے اپنے مشترکہ بیان میں کہا ہے کہ انشاء اللہ 31 اکتوبر بروز ہفتہ سریاب میں عظیم الشان ختمِ نبوت کانفرنس منعقد ہوگی۔ اس بابرکت اور عظیم الشان اجتماع کے انعقاد سے عوام میں دینی شعور عقیدۂ ختمِ نبوت سے وابستگی دینِ اسلام سے محبت اور اسلاف و اکابر کی روشن تاریخ سے آگاہی کو مزید فروغ ملے گا۔ کانفرنس میں جمعیت علماء اسلام ضلع کوئٹہ کے امیر محترم مولانا عبد الرحمن رفیق خصوصی خطاب فرمائیں گے۔ انہوں نے کہا کہ یہ عظیم الشان ختم نبوت کانفرنس شیخ الحدیث مولانا مفتی عبد الصمد شہید رحمہ اللہ اور قاری اسد اللہ رحمہ اللہ کی یاد میں منعقد کی جارہی ہے تاکہ اپنے اکابرین کے مشن کو جاری رکھا جا سکے اور انہیں خراج تحسین پیش کیا جا سکے۔ اس موقع پر حفاظ کرام کی دستار بندی بھی کی جائے گی۔ سریاب میں اس عظیم الشان پروگرام سے عوام میں دین سے محبت مزید مستحکم ہوگی انہوں نے تمام کارکنان، علماء کرام اور عوام الناس سے اپیل کی ہے کہ 31 اکتوبر کو مدرسہ دارالقرآن محمدیہ میں بھرپور شرکت فرما کر ثواب دارین حاصل کریں۔