وزیر مملکت برائے داخلہ کا پارلیمنٹ لاجز کے فنڈز میں خوردبرد ہونے کا اعتراف

اسلام آباد: وزیر مملکت برائے داخلہ طلال چوہدری نے سینیٹ کی قائمہ کمیٹی برائے داخلہ کے اجلاس میں پارلیمنٹ لاجز کے فنڈز میں خورد برد اور دیگر مسائل کا اعتراف کیا۔

اجلاس سینیٹر فیصل سلیم کی زیرصدارت ہوا، جس میں ایم این اے ہاسٹل میں غیر قانونی رہائش، پارلیمنٹ لاجز کی خراب حالت اور سیکیورٹی و صفائی کے مسائل زیر بحث آئے۔

سینیٹر وقار احمد، وقار مہدی اور پلوشہ خان نے پارلیمنٹ لاجز میں چوہوں، دیمک، خراب صفائی، غیر فعال لفٹوں اور چھت کی خراب حالت پر شدید تحفظات کا اظہار کیا۔ صحافیوں کو بھی لاجز کی موجودہ حالت دیکھنے کی دعوت دی گئی۔

چیئرمین سی ڈی اے نے واضح کیا کہ پارلیمنٹ لاجز کی الاٹمنٹ سی ڈی اے نہیں کرتی اور فنڈز سے تزئین و آرائش کا کام نہیں ہوتا، تاہم انہوں نے سروسز کو آؤٹ سورس کرنے کی تجویز دی۔

وزیر مملکت طلال چوہدری نے کہا کہ غیر معیاری کام ہوئے ہیں اور فنڈز میں خورد برد بھی ہوئی ہوگی۔ انہوں نے بتایا کہ ایم این اے ہاسٹل میں غیر قانونی لوگ رہ رہے ہیں، جن پر لاکھوں روپے کرایہ واجب الادا ہے اور زیادہ تر غیر قانونی رہائشی ایک ہی پارٹی سے تعلق رکھتے ہیں۔

چیئرمین کمیٹی نے ان افراد کی فہرست میڈیا کو فراہم کرنے کی ہدایت کی، جبکہ سینیٹر عمر فاروق نے سوال اٹھایا کہ اگر ان لوگوں کو نہیں نکالا جا سکتا تو ملک کیسے چلایا جائے گا۔

اجلاس کے دوران سینیٹر وقار مہدی نے این سی سی آئی اے کراچی کی کارکردگی پر بھی سوالات اٹھائے اور کہا کہ چھ ماہ سے درخواست دینے کے باوجود کوئی کارروائی نہیں کی گئی اور کوئی شخص ان کا نام لے کر کالز کر رہا ہے۔