ماہ رمضان بڑی فضیلتوں اور برکتوں والا مہینہ ہے،ڈاکٹر ذیشان نجم خان

ماہ رمضان بڑی فضیلتوں اور برکتوں والا مہینہ ہے،ڈاکٹر ذیشان نجم خان

اس مہینہ میں اہل ایمان کی طرف اللہ تعالٰی کی خصوصی رحمتیں متوجہ ہوتی ہیں۔معروف سیاسی و کاروباری شخصیت

اسلام آباد(نمائندہ خصوصی)گلوبل ٹائمز میڈیا یورپ کے مطابق معروف سیاسی و کاروباری شخصیت ڈاکٹر ذیشان نجم خان نے کہا کہ اسلام کی پانچ بنیادی تعلیمات میں توحید، نماز، زکاة اور حج کے ساتھ ماہ رمضان کے روزوں کا بھی شمار ہے ۔انہوں نے کہا کہ ماہ رمضان بڑی فضیلتوں اور برکتوں والا مہینہ ہے۔ اس مہینہ میں اہل ایمان کی طرف اللہ تعالی کی خصوصی رحمتیں متوجہ ہوتی ہیں۔ احادیث و آثار میں رمضان شریف کے بڑے فضائل اور برکات مذکور ہیں۔ احادیث کے مطابق رمضان کے تین عشرے تین مختلف خصوصیات کے حامل ہیں اور ہر ایک پر خصوصی رنگ غالب ہے۔ حضرت سلمان فارسی رضی اللہ عنہ سے روایت میں ہے کہ رسول اللہ صلی اللہ علیہ وسلم نے فرمایا: رمضان کا پہلا عشرہ رحمت کاہے، دوسرا عشرہ مغفرت کااور تیسرا عشرہ جہنم سے آزادی کا۔ انہوں نے کہا کہ یوں تو رمضان کا پورا مہینہ دیگر مہینوں میں ممتاز اور خصوصی مقام کا حامل ہے، لیکن رمضان شریف کے آخری دس دنوں (آخری عشرہ) کے فضائل اور بھی زیادہ ہیں۔ نبی اکرم صلی اللہ علیہ وسلم رمضان کے آخری عشرہ میں عبادت وطاعت ، شب بیداری اور ذکر و فکر میں اور زیادہ منہمک ہوجاتے تھے۔انہوں نے مزید کہا کہ رمضان المبارک میں عبادت کے ساتھ ساتھ دوسروں کا خیال و مدد کرنے میں بھی بھرپور کردار ادا کریں اور ثواب دارین حاصل کریں۔