ایران کا امریکی طیارہ بردار بحری جہاز ’ابراہم لنکن‘ کو میزائلوں سے نشانہ بنانے کا دعویٰ

آبنائے ہرمز میں کشیدگی ایک بار پھر عروج پر پہنچ گئی ہے جہاں ایران کی جانب سے ڈرون بوٹس اور بارودی سرنگوں کے ذریعے جہازوں کو نشانہ بنانے کی اطلاعات سامنے آرہی ہیں۔

میڈیا رپورٹس کے مطابق ایران نے دعویٰ کیا ہے کہ اس نے امریکی طیارہ بردار جنگی جہاز یو ایس ایس ابراہم لنکن کو میزائلوں سے نشانہ بنایا ہے۔

ایران کی فوجی تنظیم پاسدارانِ انقلاب کے مطابق امریکی کیریئر پر بیلسٹک میزائلوں اور ڈرونز کے ذریعے حملہ کیا گیا۔ ایرانی میڈیا کا کہنا ہے کہ یہ کارروائی اسرائیل اور امریکا کے حالیہ حملوں کے جواب میں کی گئی۔ بعض رپورٹس میں بتایا گیا ہے کہ ایران کی جانب سے چار بیلسٹک میزائل فائر کیے گئے۔

دوسری جانب امریکی حکام نے ان دعوؤں کی تردید کرتے ہوئے کہا ہے کہ امریکی طیارہ بردار جہاز کو کوئی نقصان نہیں پہنچا۔ ان کے مطابق میزائل جہاز کے قریب بھی نہیں پہنچ سکے اور کیریئر معمول کے مطابق اپنی فوجی کارروائیاں جاری رکھے ہوئے ہے۔