امن و سیاسی استحکام طاقت کے زور پر نہیں لایا جاسکتا، پروفیسر حلیم صادق

امن و سیاسی استحکام طاقت کے زور پر نہیں لایا جاسکتا، پروفیسر حلیم صادق
ملکی مسائل کا حل سیاسی استحکام، معاشی بحالی اور قومی اتفاقِ رائے میں ہے۔ صوبائی جنرل سیکرٹری
بلوچستان کے وسائل پر پہلا حق یہاں کے عوام کا ہے، روزگار اور بنیادی سہولیات کی فراہمی یقینی بنائی جائے۔اے پی پی
کوئٹہ: عوام پاکستان پارٹی بلوچستان کے صوبائی جنرل سیکرٹری پروفیسر ڈاکٹر حلیم صادق نے کوئٹہ میں صحافیوں کے ایک گروپ سے بات چیت کرتے ہوئے کہا ہے کہ ملک اس وقت سیاسی، معاشی اور امن و امان کے حوالے سے اہم چیلنجز سے گزر رہا ہے، ایسے حالات میں تمام سیاسی قوتوں اور ریاستی اداروں کو قومی مفاد، آئین کی بالادستی اور عوامی مسائل کے حل کو ترجیح دینا ہوگی۔ انہوں نے کہا کہ مہنگائی، بے روزگاری، بجلی و گیس کے مسائل اور کاروباری سرگرمیوں میں مشکلات نے عام شہری کی زندگی کو متاثر کیا ہے، حکومت کو فوری طور پر ایسی معاشی پالیسیوں پر توجہ دینا ہوگی جن کے ثمرات عام آدمی تک پہنچ سکیں۔ پروفیسر ڈاکٹر حلیم صادق نے کہا کہ بلوچستان پاکستان کا رقبے کے لحاظ سے سب سے بڑا صوبہ اور قدرتی وسائل سے مالا مال خطہ ہے، یہاں گیس، معدنیات، تانبہ، سونا، ساحل اور گوادر جیسی بے پناہ معاشی صلاحیت موجود ہے، مگر صوبے کے عوام آج بھی تعلیم، صحت، روزگار، پینے کے صاف پانی، بجلی، گیس، سڑکوں اور دیگر بنیادی سہولیات کے حوالے سے مشکلات کا سامنا کر رہے ہیں۔ انہوں نے مطالبہ کیا کہ بلوچستان کے وسائل سے حاصل ہونے والے فوائد میں صوبے کے عوام کو مؤثر اور منصفانہ حصہ دیا جائے اور معدنی و دیگر منصوبوں میں مقامی نوجوانوں کے لیے روزگار اور ہنرمندی کے مواقع پیدا کیے جائیں۔انہوں نے کہا کہ بلوچستان میں دیرپا امن کے لیے صرف سیکیورٹی اقدامات کافی نہیں بلکہ عوامی اعتماد، سیاسی شمولیت، انصاف، تعلیم، روزگار اور معاشی ترقی کو بھی بنیادی اہمیت دینا ہوگی۔ صوبے میں بدامنی سے کاروبار، تجارت، سفر اور عام شہری کی زندگی متاثر ہوتی ہے، اس لیے حکومت کو امن کے ساتھ ساتھ ان بنیادی وجوہات پر بھی توجہ دینی چاہیے جو عوام میں احساسِ محرومی پیدا کرتی ہیں۔ حالیہ بحث میں بھی بلوچستان کے مسائل کے حل کے لیے ترقی، تعلیم، روزگار اور بہتر عوامی خدمات پر زور دیا گیا ہے۔ پروفیسر ڈاکٹر حلیم صادق نے کہا کہ عوام پاکستان پارٹی ملک میں آئین کی بالادستی، سیاسی استحکام، معاشی انصاف اور عوامی حقوق کی بات کرتی ہے۔ سیاسی اختلافات کو دشمنی میں تبدیل کرنے کے بجائے مذاکرات اور قومی مکالمے کے ذریعے حل کیا جائے۔