لاہور ہائیکورٹ کا بڑا فیصلہ؛ نجی میڈیکل کالجز کی من مانی فیسیں غیر قانونی قرار

لاہور: لاہور ہائیکورٹ نے نجی میڈیکل کالجز کی جانب سے طلبہ و طالبات سے مقررہ حد سے زائد فیسیں وصول کرنے کو غیر قانونی قرار دے دیا۔

جسٹس خالد اسحاق نے فیسوں سے متعلق درخواستوں پر 28 صفحات پر مشتمل فیصلہ جاری کرتے ہوئے نجی میڈیکل کالجز کی تین درخواستیں مسترد اور طلبہ کی 12 درخواستیں منظور کرلیں۔ عدالت نے پاکستان میڈیکل اینڈ ڈینٹل کونسل (پی ایم ڈی سی) کا نجی میڈیکل کالجز کی فیسوں کی زیادہ سے زیادہ حد مقرر کرنے کا اختیار بھی برقرار رکھا۔

عدالت نے قرار دیا کہ نجی میڈیکل کالجز پی ایم ڈی سی کے قواعد و ضوابط کے پابند ہیں اور مقررہ حد سے زائد فیس وصول نہیں کرسکتے۔ اضافی وصول کی گئی رقم طلبہ کو واپس کرنا یا آئندہ فیس میں ایڈجسٹ کرنا ہوگی۔

فیصلے کے مطابق میڈیکل کالجز کو فیسوں میں اضافے کا جواز اور آڈٹ شدہ مالی گوشوارے پی ایم ڈی سی کو فراہم کرنا ہوں گے۔ طلبہ کی اضافی فیسوں کی واپسی یا ایڈجسٹمنٹ سے متعلق شکایات 30 ورکنگ دنوں میں نمٹانے کا حکم بھی دیا گیا ہے۔

عدالت نے واضح کیا کہ فیسوں سے متعلق شکایات اٹھانے پر طلبہ کے خلاف انتقامی کارروائی نہیں کی جاسکتی، جبکہ فیصلے کی خلاف ورزی پر توہین عدالت کی کارروائی ہوسکتی ہے۔