سعودی کاروباری وفد کا گوادر پورٹ میں تجارتی اور سرمایہ کاری کے مواقع میں دلچسپی کا اظہار

سعودی عرب کے اعلیٰ سطحی کاروباری وفد نے کراچی پورٹ ٹرسٹ کے ہیڈ آفس کا دورہ کیا، جہاں چیئرمین گوادر پورٹ نورالحق بلوچ نے وفد کو گوادر بندرگاہ کی تجارتی اور آپریشنل صلاحیتوں کے حوالے سے تفصیلی بریفنگ دی۔

بریفنگ کے دوران سعودی وفد نے گوادر پورٹ کی تجارتی استعداد، کارگو سروسز، ٹرانزٹ ٹریڈ اور ٹرانس شپمنٹ منصوبوں میں گہری دلچسپی کا اظہار کیا۔ اس موقع پر بندرگاہ پر مجوزہ ایل این جی اور ایل پی جی انرجی ٹرمینلز میں سعودی سرمایہ کاری کے امکانات پر بھی تبادلۂ خیال کیا گیا۔

چیئرمین سعودی پاکستانی بزنس کونسل شہزادہ منصور آل سعود نے دورۂ گوادر کی دعوت قبول کرتے ہوئے جلد گوادر پورٹ کا دورہ کرنے اور وہاں موجود تجارتی و سرمایہ کاری کے مواقع کا جائزہ لینے کے عزم کا اظہار کیا۔

ملاقات میں پاکستان اور سعودی عرب کے درمیان بحری تجارت اور اقتصادی تعاون کو فروغ دینے پر اتفاق کیا گیا۔ سعودی وفد کو گوادر پورٹ کے جغرافیائی محل وقوع اور آبنائے ہرمز سے باہر اس کی تجارتی اہمیت کے حوالے سے بھی آگاہ کیا گیا۔