معروف خاتون صحافی سیدہ نصرت نقوی کو اعزازی شیلڈ پیش، صحافتی و سماجی خدمات کا اعتراف

اسلام آباد (عباس آرائیں) فاؤنڈرز آف پاکستان کے زیرِ اہتمام ویمن اے آئی بزنس لیڈرشپ سمٹ اینڈ ایوارڈز 2026 کا انعقاد 7 نومبر کو مووِن پک ہوٹل اسلام آباد میں کیا گیا، جس میں خواتین کی کاروباری قیادت، مصنوعی ذہانت (AI)، جدید ٹیکنالوجی، جدت اور معاشی ترقی کے حوالے سے اہم موضوعات زیرِ بحث آئے۔

تقریب میں کاروباری، سماجی اور پیشہ ورانہ شعبوں سے تعلق رکھنے والی شخصیات نے شرکت کی۔ سمٹ کا بنیادی مقصد خواتین کی صلاحیتوں کو اجاگر کرنا، انہیں کاروباری میدان میں آگے بڑھنے کے مواقع فراہم کرنا اور جدید ٹیکنالوجی سے ہم آہنگ کرنا تھا۔

اس موقع پر ہفتہ وار اخبار نوائے نصرت کی بانی سیدہ نصرت نقوی کو فاؤنڈرز آف پاکستان کے سربراہ امیر حمزہ نے ان کی صحافتی اور سماجی خدمات کے اعتراف میں اعزازی شیلڈ پیش کی۔

سیدہ نصرت نقوی کی اس تقریب میں شرکت صحافت، خواتین کی خودمختاری، تعلیم اور سماجی خدمات کے فروغ کے لیے ان کی مسلسل جدوجہد کی عکاس ہے۔