بارہ سال بعد انٹرمیڈیٹ کے دوستوں کا شاندار ملاپ، شاہ جمال میں یادوں، محبت اور قہقہوں کی محفل سج گئی

8 نومبر کو شاہ جمال میں منعقدہ گیٹ ٹوگیدر میں 20 سے 25 پرانے دوستوں کی شرکت، تعلیمی دور کی یادیں تازہ، آئندہ بھی رابطے برقرار رکھنے کا عزم

مظفرگڑھ (رپورٹ رانا رضوان احمد) شاہ جمال ہائر سیکنڈری سکول کے انٹرمیڈیٹ فرسٹ ایئر اور سیکنڈ ایئر کے سابق طلبہ تقریباً 12 سال بعد ایک بار پھر یکجا ہوگئے۔ 8 نومبر 2026ء کو احمد کیفے سینٹر شاہ جمال میں منعقدہ شاندار گیٹ ٹوگیدر میں 20 سے 25 دوستوں نے شرکت کی، جہاں محبت، خلوص، قہقہوں اور ماضی کی حسین یادوں نے محفل کو یادگار بنا دیا۔ تقریب کا اہتمام محمد مختیار عرف وڈا بھیرہ اور نوید خان مستوئی کی خصوصی کاوشوں سے ممکن ہوا، جبکہ میزبان حاجی احمد نے بہترین میزبانی کی۔ تلاوتِ کلام پاک سے شروع ہونے والی تقریب میں دوستوں نے اپنے تعارف، موجودہ پیشہ ورانہ مصروفیات اور کامیابیوں کا تبادلہ کیا، جبکہ تعلیمی دور کی شرارتوں، اساتذہ اور کلاس روم کے دلچسپ واقعات پر خوبصورت یادیں تازہ کی گئیں۔ پاک فوج، پولیس، وکالت، طب، سرکاری ملازمت اور کاروبار سمیت مختلف شعبوں سے وابستہ دوستوں نے ایک دوسرے سے ملاقات پر خوشی کا اظہار کیا۔ شاہد فریدی نے کلیکشن، کھانے کے آرڈرز اور انتظامی امور بخوبی سنبھالے، جبکہ تاخیر سے پہنچنے والوں کے لیے سوا دو لیٹر بوتل کا دلچسپ جرمانہ بھی محفل کی رونق بنا رہا۔ شرکاء نے عزم ظاہر کیا کہ وقت اور مصروفیات چاہے کتنی ہی بڑھ جائیں، دوستی کے انمول رشتے برقرار رہیں گے اور آئندہ بھی ایسی تقریبات کا انعقاد جاری رکھا جائے گا۔