ایران جنگ کے خاتمے کی جانب مثبت پیش رفت ہورہی ہے، قطری وزیراعظم سے ملاقات کے بعد ٹرمپ کا اہم بیان

واشنگٹن: امریکی صدر ڈونلڈ ٹرمپ نے کہا ہے کہ ایران کے ساتھ جاری جنگ کے خاتمے کے لیے مثبت پیش رفت ہو رہی ہے اور فی الحال مشرقِ وسطیٰ میں دوبارہ فوجی کارروائی کا امکان کم دکھائی دیتا ہے۔

قطر کے وزیراعظم شیخ محمد بن عبدالرحمن آل ثانی سے ملاقات کے بعد ٹرمپ نے اپنے سوشل میڈیا بیان میں کہا کہ ملاقات انتہائی اچھی رہی اور ایران سمیت اہم معاملات پر تفصیلی تبادلہ خیال کیا گیا۔

ٹرمپ کے مطابق قطر، سعودی عرب، متحدہ عرب امارات، بحرین، کویت اور دیگر ممالک موجودہ صورتحال برقرار رکھنے کے حامی ہیں۔ انہوں نے دعویٰ کیا کہ ان ممالک کا مؤقف ہے کہ ایران کو جوہری ہتھیار حاصل کرنے کی اجازت نہیں دی جانی چاہیے۔

امریکی صدر نے خبردار کیا کہ اگر مشرقِ وسطیٰ کی صورتحال تبدیل ہوئی تو امریکا کارروائی کے لیے تیار ہے، تاہم ان کے بقول فی الحال دوبارہ فوجی کارروائی کا امکان بہت کم ہے۔

دوسری جانب قطر ایران اور امریکا کے درمیان کشیدگی کم کرنے اور ممکنہ معاہدے کے لیے سفارتی رابطوں میں اہم کردار ادا کر رہا ہے۔ تاہم جنگ کے خاتمے یا کسی حتمی معاہدے کی باضابطہ تاریخ کا اعلان تاحال نہیں کیا گیا۔