سونے کی قیمت میں ہزاروں روپے کا بڑا اضافہ

کراچی: ملک بھر میں سونے کی قیمت میں ایک بار پھر نمایاں اضافہ ریکارڈ کیا گیا ہے، جس کے بعد فی تولہ سونا 4 لاکھ 57 ہزار روپے سے تجاوز کرگیا۔

عالمی بلین مارکیٹ میں سونے کی قیمت 79 ڈالر اضافے کے بعد 4 ہزار 347 ڈالر فی اونس ہوگئی، جس کے اثرات پاکستان کی مقامی صرافہ مارکیٹوں پر بھی مرتب ہوئے۔

مقامی صرافہ بازاروں میں فی تولہ سونے کی قیمت 7 ہزار 900 روپے اضافے کے بعد 4 لاکھ 57 ہزار 236 روپے ہوگئی۔ اسی طرح 10 گرام سونے کی قیمت میں 6 ہزار 773 روپے کا اضافہ ہوا، جس کے بعد نئی قیمت 3 لاکھ 92 ہزار 6 روپے ہوگئی۔

دوسری جانب چاندی کی قیمت میں بھی اضافہ دیکھا گیا اور فی تولہ چاندی 140 روپے مہنگی ہونے کے بعد 6 ہزار 942 روپے کی سطح پر پہنچ گئی۔

واضح رہے کہ گزشتہ روز عالمی مارکیٹ میں سونے کی فی اونس قیمت 40 ڈالر کم ہوکر 4 ہزار 268 ڈالر ہوگئی تھی، جبکہ مقامی صرافہ بازاروں میں فی تولہ سونا 4 ہزار روپے کمی کے بعد 4 لاکھ 49 ہزار 336 روپے اور 10 گرام سونا 3 ہزار 429 روپے کمی سے 3 لاکھ 85 ہزار 233 روپے کا ہوگیا تھا۔