کوہاٹ میں پولیس لائنز کی مسجد میں دھماکا، 7 افراد جاں بحق،30 زخمی

خیبرپختونخوا کے شہر کوہاٹ میں پولیس لائنز کی مسجد میں دھماکے کے نتیجے میں7 افراد جاں بحق جبکہ 30 افراد زخمی ہوگئے۔

ریسکیو 1122 کے مطابق امدادی کارروائیوں کے دوران اب تک 30 سے زائد زخمیوں اور 7 لاشوں کو ایمبولینسز کے ذریعے ہسپتال منتقل کیا جاچکا ہے۔

انسپکٹر جنرل آف پولیس خیبرپختونخوا ذوالفقار حمید نے بتایا کہ پولیس لائنز مسجد پر دھماکے میں اب تک 25 افراد زخمی ہوگئے ہیں۔

انہوں نے مزید بتایا کہ پولیس لائنز کے ساتھ بارود سے بھری گاڑی ٹکرائی گئی ہے، تاہم دھماکے کی نوعیت کا تعین کر رہے ہیں۔

ذوالفقار حمید نے بتایا کہ دھماکے کے بعد مسلح دہشت گردوں کے ساتھ سکیورٹی فورسز کا مقابلہ بھی جاری ہے۔

انہوں نے مزید کہا کہ شہدا کا خون رائیگاں نہیں جائے گا، دہشت گردوں اور ان کے سہولت کاروں کا عبرتناک انجام ہوگا۔

ہم نیوز کے مطابق مقامی پولیس نے بتایا ہے کہ دھماکے کے زخمیوں کو ڈسٹرکٹ ہیڈ کوارٹرز (ڈی ایچ کیو اسپتال) منتقل کیا جارہا ہے جبکہ کئی زخمیوں کی حالت تشویش ناک ہے۔

ریسکیو حکام نے مزید بتایا کہ 14 ایمبولینسز اور 40 سے زائد اہلکار امدادی کارروائیوں میں مصروف ہیں۔

اسپتال انتظامیہ کا کہنا ہے کہ ڈی ایچ کیو اسپتال میں ایمرجنسی نافذ کردی گئی ہے۔